2020 оны 12 дугаар сарын 18-ны өдөр “Анагаах увидас”  сувилахуй, сэргээн засах тусламж үйлчилгээ үзүүлэх төв нээлтээ хийлээ. Тус төвийг ахмад эмч Ж.Наранчулуун өөрийн хөрөнгө оруулалтаар гэр бүлийнхнийхээ хамт бүтээн байгуулж, үйл ажиллагаа явуулахаар тусгай зөвшөөрлөө авч дөрвөн хүнийг ажлын байраар ханган ажиллахаар боллоо. “Анагаах увидас” төвд бүх төрлийн тарилга, электорфорез, улаан туяаны эмчилгээ, соронзон болон гүйлгээ бумба тавих, нойрны хямралыг эмчлэх, бага аарцгийн эрхтэн, хоол боловсруулах эрхтэн, уушигны үрэвсэл, мэдрэлийн үрэвсэл, шамбарам өвчнийг эмчлэх шар шорооны эмчилгээ, хөлийн улны массаж хийх үйлчилгээг АНУ болон  Солонгос улсын цахилгаан аппаратуудаар хийхээс гадна эрүүл мэндийн боловсрол олгох, эрүүл аж төрөх чиглэлээр сургалт, зөвлөгөөг тасралтгүй хүргэх үйлчилгээг үзүүлэх юм. Иргэд бичүүлсэн эм тариагаа хийлгэх газар олдохгүй, сувилагч гуйж хийлгэх байдал ард хоцорч, гэрээр болон тус төвөөр төлбөртэй тусламж үйлчилгээ авах боломж бүрдэж байна. Хувийн хэвшлийн тусламж үйлчилгээ үзүүлэх төв нээгдсэн нь Нэгдсэн эмнэлэг болон Өрхийн эрүүл мэндийн төвүүдийн ачаалал буурахад тодорхой үр дүнгээ өгөх үйлчилгээ юм.