• Хөвсгөл аймаг
  • Хөвсгөл аймаг
  • Хөвсгөл аймаг
ОЮУНЫ ХӨГЖЛИЙН БЭРХШЭЭЛТЭЙ ХҮҮХЭД ЗАЛУУСЫН “ ХӨГЖИЛД ХАМТДАА" ТУСГАЙ ОЛИМП АМЖИЛТТАЙ ЯВАГДАЖ БАЙНА...       Мөнгөний бодлогын мэдэгдэл...       АТГ-ын ажлын хэсэг манай аймагт...       2017 оны 3 дугаар улирлын мэдээ...       70381111 утас ажилуулах журам...       7038-1111 УТСАНД 2017.08.01 НЭЭС 08 САРЫН 31 ХҮРТЭЛХ ХУГАЦААНД НИЙТ 27 ДУУДЛАГА ИРСЭН БАЙНА...       "МӨНГӨН ТЭМДЭГТИЙН СОЁЛТОЙ ХЭРЭГЛЭЭ" АЯН...       7038-1111 утсанд ирсэн санал хүсэлт гомдол, түүний шийдвэрлэлт...       Монгол банкны мэдэгдэл...       Монгол банкнаас мэдээллэв...       2017 ОНЫ НЭГДҮГЭЭР САРЫН ЦАГ АГААРЫН УРЬДЧИЛСАН МЭДЭЭ ...       5 сарын Өргөдөл гомдлын мэдээ...       70381111 төвд байгууллагууд ажиллаж байна...       3 сарын өргөдөл гомдол...       2 сарын өргөдөл гомдлын мэдээ...      
Л.ГАНБОЛД: 2018 ОН ХӨВСГӨЛЧҮҮДИЙН ХУВЬД АЖЛЫН БАЙР НЭМЭГДЭЖ БҮТЭЭН БАЙГУУЛАЛТ ӨРНӨЖ, АМЖИЛТААР БУУХИАЛСАН ЖИЛ БОЛЛОО.

Хөвсгөл аймагт зохион байгуулагдаж  байгаа төрийн ажил үйлчилгээ,  хөрөнгө оруулалт, бүтээн байгуулалтын ажлын талаар мэдээлэл авахаар аймгийн Засаг дарга Л.Ганболдтой ярилцлаа

-Сайн байна уу та? Сайхан өвөлжиж байна уу?

Сайн. Сайхан өвөлжиж байна.

-Өвөлжилтийн  нөхцөл байдал өнөөдөр ямархуу байна вэ?

 Аймгийн хэмжээнд өвөлжилтийн нөхцөл байдал харьцангуй гайгүй байна. Өвөлжилтийн бэлтгэл ажил хангахад аймгийн төр захиргааны байгууллага, сум орон нутгийн удирдлага, ААН, албан байгууллагууд, малчид  хичээл, зүтгэл гарган хамтран ажиллаа. Мал аж ахуйн салбарын өвөлжилтийн бэлтгэлд аймгийн даргын хувьд онцгой анхаарч ажилласан. Төв суурин газруудын өвөлжилтийн бэлтгэл болох шугам сүлжээ, дулаан эрчим хүчний асуудлуудад ямар нэг доголдол гараагүй хэвийн явагдаж байна.

-Саяхан улс орон даяар мал тооллогын уламжлалт ажил өрнөсөн. Энэ жил Хөвсгөлчүүд хэдэн толгой мал тоолуулсан бэ?

-2018 оны мал  тооллогын урьдчилсан дүнгээр   Хөвсгөл аймаг 5,7 сая толгой мал тоолуулж мал сүргийнхээ тоогоор улсдаа тэргүүллээ.  Мөн аймагтаа  нийт мал сүргийнхээ тоогоор Цагаан-Уул, Бүрэнтогтох, Арбулаг, Төмөрбулаг, Галт сумд эхний таван байрт орсон амжилттай байна

-Өвөлжилтийн бэлтгэл ажил хангах хүрээнд “Хадлан тэжээл-2018” болзолт  уралдаанд манай аймаг тэргүүн байрт оржээ. Энэ талаар?

Энэ хүрээнд Засгийн газрын 2018 оны 218-р тогтоолоор  аймгийн нөөцөд 300 тонн өвс, 100 тонн тэжээл бэлтгэхээс 341 тонн өвс, 119,7 тонн тэжээл бэлтгэж, ХХААХҮЯ-аас зарласан “Хадлан тэжээл-2018” болзолт уралдаанд Улсад тэргүүн байр эзэллээ. Малчин өрхийн өвөлжилт, хаваржилтын бэлтгэл ажил 91,7 хувьтай, аймгийн хэмжээнд мал аж ахуйн өвөлжилт, хаваржилтын бэлтгэл ажил 89,7 хувьтай биелсэн байна. Хадлан тэжээлийн бэлтгэлийн ажлыг Эрдэнэбулган, Цагаан-Үүр, Тариалан сумд хошуучлан ажиллалаа.

       Гэхдээ өвлийн сар дуусах дөхөж байгаа ч малчдад маань хавар хатуухан болохыг үгүйсгэхгүй. Тиймээс дор бүрнээ хариуцлага алдалгүй, өвөл, хаврыг ажирахгүй давахыг сануулъя. Дээрх шагналын мөнгийг МАА-н салбарын  байгалийн эрсдэл даах чадавхийг нэмэгдүүлэхэд зарцуулна.

-Эмнэлгийн тусламж үйлчилгээг чанаржуулах, хүртээмжтэй болгох талд ямар арга хэмжээ авч ажилласан бэ?

Засаг даргын үйл ажиллагааны хөтөлбөрт оруулснаар бүх иргэдийг эрүүл мэндийн үзлэг оношлогоонд оруулах, бүртгэлжүүлэх, урьдчилан сэргийлэх арга хэмжээг авахаар төлөвлөн ажиллаж байгаа. Өнөөдрийн байдлаар 17 сум 2 өрхийн эмнэлэгээр дамжуулан үйл ажиллагаа явуулж байна. 2019 онд уг ажлыг үргэлжлүүлэн хийнэ.

Нэгдсэн эмнэлгийн амбулаторийн цахим үйлчилгээний ачааллыг бууруулах зорилгоор Мөрөн сумын иргэдийг өрхийн эрүүл мэндийн төвүүдэд шинжилгээгээ өгөх тогтолцоо бүрдүүллээ. Мөн хөдөлмөр магадлах комиссын байранд их засвар хийж, шаардагдах тоног төхөөрөмжөөр ханган ажиллаж, иргэдийн очер дарааллыг багасгаж нэг цэгийн үйлчилгээг бий болгоод байна. Эмнэлгийн тусламж үйлчилгээг чанаржуулах хүртээмжтэй болгох зорилгоор 2017 онд Аймгийн нэгдсэн эмнэлэгт 30 ортой халдварт сүрьеэгийн эмнэлгийн суурь тавигдаж, Галт сумын эрүүл мэндийн төв, Нэгдсэн эмнэлгийн поликлиникийн иж бүрэн засвар үйлчилгээ, Ханх, Алаг-Эрдэнэ сумын ЭМТ-ийн засвар хийх хөрөнгийн асуудлыг шийдвэрлэсэн бол, 2018 онд Шинэ-Идэр сумын Эрүүл мэндийн төвд өргөтгөл хийлээ.

2016-2018 онд 21 сумын Эрүүл мэндийн төвийн  авто машиныг шинэчилж, 57 багийн эмчийг унаажуулснаар эрүүл мэндийн тусламж үйлчилгээг иргэдэд шуурхай хүргэх боломж бүрдлээ. Мөн диализийн аппаратаар хангаж, бөөрний дутагдалтай иргэд орон нутагтаа эмчлүүлэх боломжтой болсноор иргэдийн зардал хэмнэсэн шинэ үйлчилгээ нэмэгдсэн.

Сүрьеэгийн өвчнийг илрүүлэхэд 120 сая төгрөгний өртөг бүхий дижитал флюр аппараттай болсноор хөдөөгийн сумдад эрт илрүүлгийн баг ажиллаж сүрьеэгийн өвчлөлтэй тохиолдлыг эрт илрүүлж, эмчилгээнд хамруулснаар цаашид халдварлах тохиолдлыг бууруулж байна. Басхүү Японы Жайка төслийн хүрээнд 18 сар хүрч буй хүүхдийг эрүүл мэндийн иж бүрэн оношлогоонд хамруулсан.

-Өмнө жилүүдэд нярайн эндэгдэл өндөр аймгийн тоонд орж явсан. Нярайн эндэгдэл буурч байна уу?

- Эрүүл мэндийн төвүүдэд жирэмсний хяналтын чанар сайжирч эхийн ноцтой хүндрэл 5 тохиолдлоор, нярайн эндэгдэл өмнөх оноос 23.5%-иар буурсан үзүүлэлттэй байна.

- Манай аймагт 2012-2016 онуудад “Хүүхдэд ээлтэй орон нутаг” хөтөлбөр хэрэгжсэн. 2016 онд “Гэр бүл хүүхдийн хөгжлийг дэмжих” жил болгон зарлаж байсан. Тэгвэл 2019 онд “Хүүхэд хамгаалал-Өрхийн хөгжил”-ийг дэмжих жил болгон зарлалаа. Яагаад?

- Өмнө жилүүдэд энэ чиглэлд  явуулж байсан ажил үйлчилгээ тодорхой үр дүнд хүрсэн.  Монгол Улсын Засгийн газраас хүүхдийг эрсдлээс хамгаалах бодлого, чиглэл гаргасны  дагуу “Хүүхэд хамгаалал-Өрхийн  аюулгүй  байдал” аянг  аймгийн хэмжээнд өрнүүлж, хүүхэд хамгаалал, өрхийн аюулгүй байдлын асуудлаар эрсдлийн үнэлгээг  төрийн болон төрийн бус байгууллагын 801 хүний бүрэлдэхүүнтэйгээр зохион байгуулж, нийт өрхийн 53.6%-д эрсдлийн үнэлгээг эхний ээлжинд хийлээ.

Үнэлгээнд хамрагдсан өрхүүдийн 10.6 хувь нь эрсдлийн түвшин маш өндөр, 86.2 хувь нь эрсдлийн түвшин дундаж үнэлгээтэй гарсан тул “Хүүхэд хамгаалал-Өрхийн хөгжил”-ийн асуудалд анхаарлаа хандуулж, 2019 оныг нэрлэсэн жил болгон зарлахаар болсон.

-Өнгөрсөн хугацаанд хүүхэд хамгааллын чиглэлд ямар ажлууд хийгдсэн бэ?

-Хүүхэд хамгааллын чиглэлээр 2018 онд хийсэн бодитой ажлын нэг нь Нэгдсэн Үндэсний байгууллагын Хүн амын сангийн дэмжлэгээр хүчирхийллийн хохирогчдод үйлчилгээ үзүүлэх “Нэг цэгийн үйлчилгээний төв”-ийг аймагт байгуулсан. Уг төвөөр дамжуулан гэр бүлийн болон бэлгийн хүчирхийлэлд өртсөн хохирогчдыг түр байрлуулах, хамгаалах, сэтгэл зүй, эрүүл мэнд, хууль эрх зүйн зөвлөгөөг нэг дор үзүүлж, хоногийн 24 цагийн турш тасралтгүй үйл ажиллагаа явуулна.

Хүчирхийлэл, аливаа эрсдэлд өртсөн гэр бүлд хариу үйлчилгээ үзүүлэх “Хамтарсан” багийг сум бүрт ажиллуулж мэргэжил арга зүйн удирдлагаар ханган ажиллаж байна. “Хариуцлагатай хамтарсан баг” бүсийн зөвлөлдөх уулзалт, сургалтыг зохион байгуулж, хамтарсан багийн гишүүдийг чадавхжуулснаар хариу үйлчилгээний шийдвэрлэлт 10.3% аар нэмэгдсэн.  273 кейст хариу үйлчилгээ үзүүлж, урьдчилан сэргийлэх сургалт, нөлөөллийн арга хэмжээнд  7560 хүүхэд, 5320 насанд хүрэгчдийг хамруулж, гэр бүлийн хүчирхийлэл, аливаа эрсдэлт нөхцөлд өртсөн дуудлага мэдээллийн 68.0 хувийг харъяа хамтарсан багийн оролцоотой шийдвэрлэж, эрсдэлт нөхцөлд байгаа 143 гэр бүл, 194 хүүхдийг илрүүлж үйлчилгээ үзүүлсэн байна.

Хүүхдийн хөгжил, хамгааллын үндэсний хөтөлбөрийн хүрээнд “Хүүхдийн хөгжил, хамгааллын жишиг сургууль”-ийн загвар бий болгох ажлыг аймагт эхлүүлж, Мөрөн сумын “Сод-Эрдэм” сургуулийг сонгон хэрэгжүүлж, сургуулийн хүүхэд хамгааллын бодлогын баримт бичгийн хэрэгжилтэнд үнэлгээ өгч ажиллаж байна.

-Аймгийн боловсролын салбар ямар амжилттай ажилласан бэ?

-Оюунлаг –Хөвсгөл хөтөлбөрийн хүрээнд  аймгийн Ерөнхий боловсролын сургууль, цэцэрлэгийн барилгын 85 хувийг орчин үеийн стандартын шаардлага хангасан барилгатай болгож, ус ариун ариун цэврийн байгууламжийг шинэчилснээр хүүхдийн сурах орчин нөхцөлийг сайжруулж, хүүхдэд ээлтэй байдал нэмэгдсэн.

Элсэлтийн ерөнхий шалгалтын үнэлгээ 2016 онтой харьцуулахад 8 байраар урагшилж 2018 оны үзүүлэлтээр улсад 7-р байр эзэлсэн амжилтыг үзүүллээ. Цахим Хөвсгөл хөтөлбөр хэрэгжүүлж, боловсролын салбарт мэдээлэл технологийн дэвшлийг нэвтрүүлэх чиглэлээр чадавхжуулах сургалтыг багш нарын дунд үе шаттай явуулан,  2019 онд цахим номын санг бий болгохоор ажиллаж байна.

Мөн Англи хэлийг бүх нийтийн хэрэглээ болгоход анхаарч, аймгийн Иргэдийн Төлөөлөгчдийн Хурлаар “Дэлхийн Хөвсгөл” хөтөлбөр батлуулан лингафоник төхөөрөмж суурилуулсан кабинетийг 4 сургуульд тохижуулав. Цаашид 50 хувьд хүргэх төлөвлөлттэй байна.

 Боловсролын салбарт сургалтын чанарыг тооноос илүү бүтээлч чадвараар үнэлэх бодлого барин, бүх сургуульд шинжлэх ухаанч хүүхдүүдийн клуб байгуулж, сурагчдын оролцоог дэмжиж байна.

-Дэд хөтөлбөрүүдийн биелэлтээс харахад “Ажилтай орлоготой-Хөвсгөл” дэд хөтөлбөр 95,38 хувийн биелэлттэй байсан. Байнгын ажлын байраар хэдэн хүн хангагдсан бэ?

-“Ажилтай орлоготой- Хөвсгөл” дэд хөтөлбөрийн хүрээнд 2016-2018 онд 6028 байнгын ажлын байр, 2706 түр ажлын нийт 8734 ажлын байрыг бий болгосон байна. Ажилгүйдлын түвшин 2018 оны 3-р улирлын байдлаар 6,7 функт байгаа нь улсын дунджаас 0,2 функтээр бага байна. 

- Хувийн  хэвшлүүд  ч ажлын байр нэмэгдүүлж, орон нутгийн орлогод хувь нэмрээ оруулж байх шиг байна. Энэ тухай?

-“Номин”, “Эм Си Эс-ийн агуулах”-ын бөөний худалдаа, “Эрхэс” “Оргил” бөөний худалдааны төвүүд ашиглалтад орж, иргэдийг хямд үнэ, ая тухтай, тохилог үйлчилгээгээр ханган, итгэлцлийг бий болгон ажиллаж байна. Event Hall, Green gold, Өргөө,  Танил Жаргалан  зэрэг үйлчилгээний газрууд нийтийн хоол үйлдвэрлэл, үйлчилгээний салбарт шинэ стандартыг тогтоож, ажлын байр нэмэгдүүлэн, орон нутгийн орлогод хувь нэмэр оруулж байна. “Шинэ Мөрөн” худалдааны төвийг бүрэн ашиглалтад оруулж, худалдаа эрхлэгчдийг тохитой орчинд худалдаа үйлчилгээ хийх нөхцлийг бүрдүүлж, 300 гаруй хүнийг байнгын ажлын байраар ханган, эрүүл ахуйн стандартын шаардлага хангасан орчинг бий болгон ажиллаж байна.

-Аймаг, сумдад мах боловсруулах, хуурай сүүний, чулууны үйлдвэрүүд баригдаж иргэдийг ажлын байраар хангаж байна. Цаашид ямар үйлдвэрлэлүүд нэмэгдэх бол?

Цаашдаа мод боловсруулах, сүү боловсруулах, дагалдах баялгийг боловсруулах үйлдвэр, оёдлын үйлдвэрүүдийг нэмэгдүүлэхэд бодлогоор дэмжиж байна. Ингэснээр ажлын байр нэмэгдэнэ. Мод боловсруулах үйлдвэрийн ТЭЗҮ, зураг төслийг гаргасан байгаа. Манай аймаг уул уурхайгүй аймаг. Энэ бодлогын хүрээнд цаашид орлогын түвшинд анхаарч аялал жуулчлалын тулгуур төв болохтой уялдуулан шинэ техник, технологитой  үйлдвэрүүдийг барьж иргэдийг ажлын байраар хангасан, нэмүү өртөг шингэсэн бүтээгдэхүүн үйлдвэрлэх  үйлдвэрүүдийг барьж байгуулах бодлогыг баримтална.

-2018 онд “Амьдрах орчноо сайжруулж, Ахмад настнаа дэмжих” жил болгон зарласан. Ахмадууд руу чиглэсэн онцлох ажил, үр дүнгийн талаар мэдээлэл өгнө үү?

2018 оныг “Амьдрах орчноо сайжруулж-Ахмад настнаа дэмжих” жил болгон зарлаж, нэрлэсэн жилийн ажлын хүрээнд  Хөвсгөл аймгийн төр захиргааны байгууллага, хувийн хэвшил, ААН байгууллагууд, иргэд идэвхтэй хамрагдан энэхүү ажлыг аймаг, сумандаа тодорхой үр бүтээлтэй  гүйцэтгэлээ.

Ахмадын байгууллагын 30 жилийн ой, Ахмадуудад зориулсан урлаг спортын наадмыг 2 үе шаттай зохион байгууллаа. Мөн ахмад настан, хөгжлийн бэрхшээлтэй иргэдийн чийрэгжүүлэх 27 төвийн  үйл ажиллагааг дэмжиж 80 сая төгрөгийн хөрөнгө оруулалтаар 24 нэр төрлийн тоног төхөөрөмжөөр хангалаа. Чийрэгжүүлэх төвүүд тогтмол ажилласнаар ахмад настан, хөгжлийн бэрхшээлтэй иргэд хөдөлгөөний дутагдалд орох, даралт ихдэх, зүрх судасны өвчнөөс урьдчилан сэргийлж, ахмадуудын нийгэмд оролцох оролцоог нэмэгдүүлж, чөлөөт цагаа зөв зохистой өнгөрүүлэх боломж бүрдсэн. Орон нутгийн 64,0 сая төгрөгийн хөрөнгө оруулалтаар нийтийн тээврийн автобусыг үйлчилгээнд явуулж, ахмадууд, хөгжлийн бэрхшээлтэй иргэдэд үнэ төлбөргүй үйлчилж байна. Аймгийн хэмжээнд эрчим-1,2 амралтыг өргөжүүлэх, тоног төхөөрөмжөөр хангах ажлуудад 250,0 сая төгрөгийг зарцуулж ажилласнаар 2018 онд амарсан амрагчдын тоо өмнөх жилүүдээс эрс нэмэгдсэн байна.   2018 онд нийт ахмадуудын 15% нь буюу 1680 ахмад 3 төрлийн амралт, сувилалд амарч нийгмийн халамжийн сангаас 245,0 сая төгрөгийн хөнгөлөлт авсан байна.

Ахмад настны хөнгөлөлт, тусламжид 13734  иргэнд 883,5 сая төгрөгийн дэмжлэг, хөнгөлөлт үйлчилгээг үзүүлсэн бөгөөд зорилтот бүлгийн ахмад настан, хөгжлийн бэрхшээлтэй иргэд, амьжиргааны баталгаажих түвшнээс доогуур орлоготой 50 иргэнд гэр олгож, 93 иргэнд орон гэрээ засаж сайжруулахад нь бодитой дэмжлэг үзүүлсэн нь ахмадуудын сэтгэлд нийцсэн арга хэмжээ боллоо гэж үзэж байгаа.

24 сумын 159 байгууллагын 749 харьяалалгүй ахмад настныг харьяалалдаа авч санхүүгийн болон сэтгэл зүйн дэмжлэг туслалцаа үзүүлж ажилласан. Аймгийн ахмад настны асрамж үйлчилгээний төвийн барилгыг Хөдөлмөр нийгмийн хамгааллын яамны 100,0 сая төгрөгийн санхүүжилтээр их засвар хийж ашиглалтад орууллаа.

-Шугам, сүлжээ, зам, гэрэлтүүлгийн онцлох ажлуудаас дурьдвал?

2018 онд Арбулаг, Бүрэнтогтох, Тосонцэнгэл, Цэцэрлэг, Цагаан-Үүр, Мөрөн, Ханх, зэрэг сумдын 0,22кВ болон 0,4кВ-ын Цахилгаан дамжуулах агаарын шугамыг шинэчлэх ажил нийт 3,1 тэрбум төгрөгний ажлууд улсын төсвийн хөрөнгөөр хийгдэж байна. Ингэснээр Эрчим хүчний чанар сайжирч найдвартай эрчим хүчээр хангах боломж бүрдэж шугамын алдагдал болон хүчидлийн уналт багассан. Мөн Алаг-Эрдэнэ сумын нутаг дахь “50 100” цогцолборт баригдах 35/04 -ийн дэд өртөө шугамын ажил, Түнэл, Төмөрбулаг  сумдын төвийн цахилгаан хангамжийн шугам сүлжээний өргөтгөлийн ажлыг   дуусгаж  ашиглалтад хүлээн авлаа.

 Замын сангийн хөрөнгөөр аймгийнхаа зам талбай, давааг засаж сайжруулах ажлыг хийлээ. 2018 онд аймгийн хэмжээнд 1.5 км хэвтээ холбоосын зам гэрэлтүүлэг, явган зам, авто машины 4 зогсоолыг мөн Ханх-Улсын хил чиглэлийн  23 км хатуу хучилттай авто замын ажлыг ашиглалтад орууллаа. Мөрөн хотоо гэрэлтэй болгох бодлого барьж 1, 3, 4, 5, 6, 7, 11, 12-р багуудад гэрэлтүүлэгийн ажлыг хийж гүйцэтгэлийг гаргаж өнөөгийн байдлаар мөрөнгийн төвийн 1, 2, 3, 4, 6, 7-р багууд гэрэлтүүлэгтэй  болсон.

Цагаан-Уул сумаас Цэцэрлэг сумын чиглэлд 80,5 км урттай шилэн кабелийн суурилуулалтыг 424 сая төгрөгийн хөрөнгө оруулалтаар хийж гүйцэтгэлээ. 2018 онд Ренчинлхүмбэ, Цагааннуур сумдад шилэн кабельд холбох зураг төсөв боловсруулж, гүйцэтгэлийн ажил хийгдэж байна.

2018 онд Авто тээврийн үндэсний төвийн гадна зам талбай, хашаа, нийтийн “00”, инженерийн шугам сүлжээний ажлыг Авто тээврийн үндэсний төвийн хөрөнгө оруулалтаар 800 сая төгрөгөөр гүйцэтгэж  ашиглалтад хүлээн авсан.

-Орон сууцнууд ашиглалтанд орж, иргэд ая тухтай орчинд амьдрах боломж бүрдэж байх шиг байна. 2016 оноос хойш хэдэн орон сууц ашиглалтанд орсон бэ?

-2016 оноос хойш 11 хувийн хэвшлийн аж ахуйн нэгжийн  хөрөнгө оруулалтаар 375 айлын орон сууцыг ашиглалтад оруулсан. Хөгжлийн банкны хөрөнгө оруулалтаар Шинэ мөрөн хорооллын ерөнхий төлөвлөгөөний дагуу 560 айлын орон сууц баригдахаас 135 айлын орон сууц баригдаж, ашиглалтад өгөхөд бэлэн боллоо. “Шинэ Мөрөн” хорооллын хэсэгчилсэн ерөнхий төлөвлөгөөний дагуу  гадна инженерийн шугам сүлжээний ажлыг улсын төсвийн хөрөнгөөр 3,4 тэрбум төгрөгөөр батлуулан хийж 560 айлыг холбож байгаа.

  Аймгийн цагдаагийн албан хаагчдын 40 айлын орон сууцны барилга ашиглалтанд орсон. Ингэснээрээ төрийн төлөө зүтгэж байгаа цагдаагийн албан хаагчид түүний ар гэр  аятай тухтай орчинд амьдрах сайхан боломж бололцоо бүрдлээ. Ирэх жил ШШГАлбаны 35 айлын орон сууц баригдана. Цаашдаа барилгын салбарт нөлөөлөх бүтээгдэхүүн ажил үйлчилгээнд нь аймгийн зүгээс  бүхийл бодлогоор дэмжин ажиллах болно. Мөн ирэх жилээс “Зүүн Мөрөн хороолол”-ын ажлыг эхлүүлэх саналыг холбогдох байгууллагад хүргүүлсэн.

Манай аймгийн аялал жуулчлалын  гол урсгал Хөвсгөл нуур руу чиглэдэг. Нуурын бохирдол бууруулах талд ямар арга хэмжээ авч байгаа вэ?

Хөвсгөл нуурын байгалийн цогцолборт газарт хяналт, шинжилгээ үнэлгээний ажлыг эрчимжүүлэх, аялал жуулчлалаас үүсч байгаа бохирдлыг бууруулах ажлыг зохион байгуулахад Байгаль орчин, аялал жуулчлалын яамтай хамтран ажиллалаа. Энэ ажлын хүрээнд аймгийн Засаг даргын 2017 оны 15 дугаар албан даалгаврыг гарган хэрэгжүүлсний үр дүнд Алаг-Эрдэнэ, Ханх, Чандмань-Өндөр сумдын Засаг дарга, Хатгал тосгоны Захирагчийн шийдвэрээр олгосон газрын хугацаа дууссан, үйл ажиллагаа явуулаагүй 454,3 га, газрын тухай хуулийн дагуу хоёр жил дараалан үйл ажиллагаа явуулаагүй 79 иргэний 513,4 га газрыг хүчингүй болгох чиглэлээр сумдад үүрэг өгч, “Хөвсгөл нуурын Улсын тусгай хамгаалалттай газар” нутагт газар ашиглах гэрээг цуцлах 25, газар ашиглаж байгаа ч талбай хэтэрсэн 46 нийт 71 иргэн, аж ахуйн нэгжүүдийн судалгааг гарган БОАЖЯаманд хүргүүлж 12 иргэн аж ахуйн газрыг цуцалсан.

-Өвлийн аялал жуулчлал хөгжүүлэх арга хэмжээний тухайд?

Өвлийн аялал жуулчлалыг хөгжүүлэх зорилгоор Рэнчинлхүмбэ суманд энэ жилээс  “Цас цааны баяр”-ыг  зохион байгуулж эхэлсэн. 2019 онд энэхүү баярыг “Хөх сувд-2019” эвент арга хэмжээтэй уялдуулан зохион байгуулахаар аймгийн ИТХ-ын Тэргүүлэгчдийн шийдвэр гарсан байгаа.

-Хөвсгөл аймаг хуурай мод, шинэсэн ойгоороо улсад тэргүүлдэг. Байгаль хамгаалах чиглэлээр болон ойн санг доройтолд өртөхөөс сэргийлэхэд авсан арга хэмжээ?

- Аймгийнхаа нийт газар нутгийг орон нутгийн тусгай хэрэгцээнд авснаар уул уурхайгүй аймаг болох бодлогыг тогтвортой хэрэгжүүлж байна. Байгаль хамгаалах чиглэлээр ойн санг доройтолд өртөхөөс хамгаалж 150 га-д ойжуулалтын ажлыг хийж, ургалт 75 хувиас дээш байна. Мөн Дэлгэрмөрөн голын загасны бодит нөөцийг бүрдүүлэх зорилгоор 150 мянган жарамгайг үржүүлсэн нь улсын хэмжээнд туршлага болохуйц шинэлэг ажил боллоо.

-Гадаад харилцаа, хамтын ажиллагааг өргөжүүлэх хүрээнд аймгийн удирдлагын хувьд ямар улсад албан ёсны айлчлал хийв? Ингэснээр орон нутагт  хүртэх үр дүн юу байв?

-Найрсаг-Хөвсгөл гадаад харилцааны дэд хөтөлбөрийн хүрээнд аймгийн удирдлагууд БНСУ, Япон, ХБНГУ-д албан ёсны айлчлал хийлээ. Барут Марк Мөрөн сумын хамтын ажиллагааны хүрээнд  “Мэдээлэл сургалтын төв” барих төсөл хэрэгжүүлж, 2019 оны 6 сард ашиглалтад бүрэн оруулахаар ажиллаж байна. Мөн Мөрөн сумын хог хаягдлын менежментийг сайжруулах төсөл хэрэгжүүлэхээр болсон нь орон нутагт эдийн засгийн үр өгөөжтэй зүйл болно.

Харилцаа, хамтын ажиллагаат Бүгд Найрамдах Солонгос улсын Тежон хотын Со дүүрэгт Урлагийн фестивалд амжилттай оролцож,  Тэжон хотын Со дүүргийн Засаг даргын урилгаар аймгийн Засаг даргаар ахлуулсан төлөөлөгчид айлчилж, эмч нарын сургалт, сурагч солилцооны хөтөлбөр, урлагийн фестивалд  оролцох талаар  хамтран ажиллахаар шийдвэрлэлээ.

- Аймгийн Засаг даргын үйл ажиллагааны хөтөлбөрийн хэрэгжилт энэ онд хэдэн хувьтай биелэгдсэн гэж дүгнэгдсэн бэ?

  2016-2020 оны аймгийн Засаг даргын үйл ажиллагааны “Хөгжлийн хөтөч” хөтөлбөрийн хэрэгжилтийг хангах хүрээнд жил бүр аймгийн нийгэм эдийн засгийг хөгжүүлэх үндсэн чиглэлийг  батлан хэрэгжүүлж байна. Үндсэн чиглэлийн биелэлтийг хангахад аймгийн ИТХ, Засаг даргаас эхлээд төр захиргааны байгууллага, хувийн хэвшил,  ААН-үүд, иргэдийн хамтын оролцоо чухал юм. Аймгийн нийгэм эдийн засгийг хөгжүүлэх 2018 оны үндсэн чиглэл нийт 180 ажлыг төлөвлөн ажиллаж, ажлынхаа үр дүнг  90,2%-ийн биелэлттэй гэж үнэлүүлсэн.   2016-2020 оны “Хөгжлийн хөтөч”  аймгийн Засаг даргын үйл ажиллагааны хөтөлбөр 75,1 хувийн биелэлттэй байна. 2020 он гэхэд 100 хувь хэрэгжүүлэх боломж бидэнд бий.

-Манай аймаг эдийн засгийн бодлого, өрсөлдөх чадвараараа бусад аймгуудаас хэд дүгээр байранд явж байгаа бол?

- Эдийн засгийн бодлого өрсөлдөх чадварын судалгааны төвөөс эрхлэн гаргасан аймгуудын өрсөлдөх чадварын үзүүлэлтээр манай аймаг эдийн засгийн тамир тэнхээгээр 11-р байранд ,Засаглалын үр ашгаар- 18-р байранд, Бизнесийн үр ашгаар- 4-р байранд, Дэд бүтцийн салбарт 15-р байранд буюу өрсөлдөх чадварын  нэгдсэн үнэлгээгээр-3-н байр урагшлан 13-р байранд  эрэмбэлэгдсэн.

-2019 онд хэдэн тэрбум төгрөгний төсөв батлагдсан вэ?.

 2019 онд аймгийн төсвийн орлогын дүн батлагдаж нийт 89,7 тэрбум төгрөгийн аймгийн төсөв батлагдсан. Аймгийн ОНХС-д батлагдаж ирсэн санхүүжилтийг зарцуулах журмын  дагуу, иргэдээс авсан санал эрэмбийг харгалзан үзэж  аймагт,  иргэдэд хамгийн их шаардлагатай, хүлээгдэж байгаа ажлуудад чиглүүлэн тавилаа.

-Хөвсгөлчүүддээ хандаж хэлэхэд?

Хөвсгөлчүүд минь өвлийг өнтэй давж,  урин хавартай золгож олон ажлыг хамтдаа хийж, үр дүнг үзэх цаг хугацаа биднийг хүлээж байна. Төр, иргэнээ дээдлэн алдаа  дутагдлаа засаж залруулах,  иргэдийнхээ хандлага, сэтгэлгээ хийгээд төлөвшлийг өөрчлөхийн төлөө хичээнгүйлэн ажиллах болно. Бид ямагт зөвийг эрэлхийлж, хүүхэд, залуучуудынхаа ирээдүйг харсан бүтээн байгуулалт хөгжлийн түүчээг эрчимжүүлэн манлайлал, ёс зүйг эрхэмлэн ажиллана гэдгийг онцлон хэлье.

Ярилцсанд баярлалаа танд амжилт хүсье!

Б.Гэрэлням

 

Нийтэлсэн: 2019-01-09 17:50:24
Танд мэдээлэл таалагдаж байвал like хийнэ үү. Баярлалаа

Сайтын хандалт

Өнөөдөр:   55
Нийт хандалт:   161173
Таны IP:   34.236.145.124