• Хөвсгөл аймаг
  • Хөвсгөл аймаг
  • Хөвсгөл аймаг
АТГ-ын ажлын хэсэг манай аймагт...       2017 оны 3 дугаар улирлын мэдээ...       70381111 утас ажилуулах журам...       7038-1111 УТСАНД 2017.08.01 НЭЭС 08 САРЫН 31 ХҮРТЭЛХ ХУГАЦААНД НИЙТ 27 ДУУДЛАГА ИРСЭН БАЙНА...       "МӨНГӨН ТЭМДЭГТИЙН СОЁЛТОЙ ХЭРЭГЛЭЭ" АЯН...       7038-1111 утсанд ирсэн санал хүсэлт гомдол, түүний шийдвэрлэлт...       Монгол банкны мэдэгдэл...       Монгол банкнаас мэдээллэв...       2017 ОНЫ НЭГДҮГЭЭР САРЫН ЦАГ АГААРЫН УРЬДЧИЛСАН МЭДЭЭ ...       5 сарын Өргөдөл гомдлын мэдээ...       70381111 төвд байгууллагууд ажиллаж байна...       3 сарын өргөдөл гомдол...       2 сарын өргөдөл гомдлын мэдээ...       ИРГЭДЭД ҮЙЛЧЛЭХ 7038-1111 ТӨВ”-ИЙН ҮЙЛ АЖИЛЛАГААНЫ ЯВЦЫН МЭДЭЭЛЭЛ...       Захиалагчийн хяналтын зардлын дансны орлого, зарлагын гүйлгээ...      
Ер нь аливаа хөгжил залуучуудын идэвх санаачлага, оролцоон дээр л тулгуурлагдаж байдаг гэдгийг олж харсан нутгийнхаа удирдлагуудад талархаж байна.
Нийтэлсэн: 2015-07-05 18:59:27

Нутаг орныхоо нэрийг өндөрт өргөж яваа авъяаслаг олон залуучуудын төлөөлөл болсон Жаргалсайханы Оргил хэмээн энэ залуу сүүлийн үеийн Монголын тайз дэлгэцийн бүтээлүүдийн өнгийг тодорхойлж буй. Түүний бичсэн олон кино жүжгийг бид сэтгэл догдлон үздэг ч чухам зохиогч нь хэн, ямар хүн гэдгийг төдийлөн мэддэггүй. Тэрээр “Валентиний захидал”, “Амьдралд тавтай морил”, “Зүүдэнд ч оромгүй явдал”, “Хүүгүй ломбард”, “Гурван найз яасан байх нь вэ?” зэрэг дэлгэцийн бүтээл, “Миний нууц хүү”, “Найрын ширээний ууц” мюзикл зэрэг тайзны бүтээлийг  үзэгчдийн хүртээл болгожээ.

Жаргалсайханы Оргил 1986 онд Түнэл суманд төрсөн. Утга зохиолын ажилтан сэтгүүлч мэргэжилтэй. “Хөх мэдрэхүй” утга зохиолын бүлгэмд харъяалагддаг бөгөөд “Саранд үүрлэсэн шувуу”, “Одод бороо шиг байхад” яруу найргийн ном хэвлүүлсэн. Өдгөө тэрээр Улаанбаатар хотод эхнэр охины хамт амьдарч байна. Удахгүй алс холын Австралийг зорьж гэр бүлийнхээ хамт суралцах гэж буй түүнтэй нутагтаа ирээд амарч байхтай тааралдан цөөн хором ярилцсанаа толилуулъя.

 

Сүүлийн үед уран бүтээлийн олз омог хэр байна даа.

 

Энэ жилийн хувьд уран бүтээлийн олз ихтэй л байна. Хамгийн сүүлд гэхэд “Гурван найз яасан байх нь вэ” кино зохиол бичлээ. Одоо “Ээжээ” гэдэг кино зохиол дээр ид ажиллаад бараг бэлэн болгож байна.

 

Кино зохиолынхоо санааг хаанаас олж авдаг вэ?

 

Ер нь бол кино уран бүтээлчдийн талаас захиалга ирж түүнийг нь гүйцэлдүүлдэг гэх үү дээ. Мэдээж өөрийн санаа, зохиолчын зүгээс хэлж тусгах зүйлсээ бүрэн дүүрэн гаргаж өгөхийг зорьдог. Харин сүүлийн үед яг өөрийн дотоодоо өчсөн илүү мэргэжлийн талын ч гэж хэлж болохоор кино зохиол дээр сууж байна. Миний өмнө бичсэн зохиолууд үргэлж л хүмүүсийг хөгжөөн баясгах, инээдмийн жанрын кинонууд байлаа. Үүний нэг дутагдал нь зарим нэг уран бүтээлч анд нөхдөөсөө шүүмжлэл хүртэх гээд байдаг талтай. Гэхдээ л би уран бүтээлчийн хувьд Оргил гэдэг хүнийхээ мөн чанар, амьдралд хандах хандлага, дотоод ертөнцийг нээсэн уран бүтээлээ бичихийг зорьж, зорилгодоо хүрэхийн тулд чимээгүйхэн туурвисаар ирсэн. Удахгүй та бүхэнд хүрч эхэлнэ гэж найдаж байна.

 

Чиний бичсэн кинонууд дандаа л ашиг орлогоороо тэргүүлэх юм. Энэ юуных вэ?

 

Нэгдүгээрт хамтран ажилласан кино уран бүтээлчид маань киногоо олон нийтэд хүргэх тал дээр хэрхэн яаж ажиллахаа мэддэг чадварлаг, мэргэжлийн уран бүтээлчид байдаг. Хоёрдугаарт цаг үеэ зөв мэдэрч киноныхоо сэдвийг сонгодог юм болов уу гэж боддог доо.

 

МҮОНРТ-д ажиллаж байсан одоо хаана ажиллаж байна вэ?

 

МҮОНРТ-д зохиолч редакторын ажлыг сүүлийн 3 жил гаруй хугацаанд хийлээ. Энэ хугацаанд телевизийнхээ уран бүтээлчидтэй хамтарч олон ч теле жүжиг хийлээ. Мөн “Монголын нэг өдөр” зэрэг томоохон төсөл нэвтрүүлгүүдийг үзэгчдийн хүртээл болголоо. Цаашдаа олон зүйл хийх хүсэл эрмэлзлэл дүүрэн хэдий байсан ч эхнэр маань тэтгэлэг авч Австралид суралцах болсноос шалтгаалж гэр бүлээрээ тэнд хэдэн жил амьдрахаар болсон. Тэгээд өнгөрсөн өвөл ажлаа өгөөд одоогоор гэртээ чөлөөт уран бүтээлчийн хувиар сууж байна даа. Ажилтай байх нь олон нийттэй харилцаж, уран бүтээлчдийн халуун тогоонд уран бүтээлийн тухай яриа өрнүүлж, хэн хэнээсээ суралцах сайн талтай ч гэртээ суугаад уран бүтээлүүдээ эргэн харж цаашдаа хийж бүтээхээ төлөвлөж, эхнээс нь хийж бүтээгээд явах шиг сайхан зүйл алга. Энэ хугацаанд би өөрийгөө илүүтэй нээн таних шиг л болж байна. /Инээв./

 

Хүмүүс чамайг кино жүжгийн зохиол бичдэг гэхээсээ илүүтэй яруу найраг, үргэлжилсэн үгийн төрлөөр бичдэгийг чинь огт мэддэггүй шиг санагддаг.

 

Тэр ч тийм шүү. Яах вэ кино жүжгүүд маань олон нийтэд хүрэхээр угаасаа тэгж харах нь аргагүй л дээ. Ер нь энд нэг зүйлийг хэлэхэд кино жүжиг бичнэ гэдэг миний амьдрах арга хэлбэр гэх үү дээ. Би хүн л юм чинь талхныхаа мөнгийг олох, үр хүүхэдээ тэжээх шаардлагатай шүү дээ. Шавар зуурч, тоосго өрж чадахгүй над шиг цагаан гартай хүн өөрт заяасан жаахан авъяасаараа л амьдарч байгаа минь энэ. Нэгэнт л миний нэр дээр гарч байгаа уран бүтээлүүд хойно ямарч шүүмжлэл магтаалыг би хүлээн авна. Дээр хэлсэнчлэн харин Оргил гэдэг хувь уран бүтээлчийг тодотгосон цэвэр урлагийг бүтээхийн тулд ажиллаж байна. Миний яруу найраг, үргэлжилсэн үгийн зохиолуудад энэ маань биелэлээ олох байх.

 

“Хөх мэдрэхүй” бүлгийнхэнтэйгээ холбоотой байна уу?

 

Холбоотой байлгүй яах вэ? Чамтай уулзаад л сууж байна шүү дээ. Ер нь бид энэ бүлгэмийг анх байгуулж байхдаа л нэг зүйлийг сайн олж харсан бололтой. Учир нь тэр үед маш олон оюутнууд шүлэг яруу найраг, уран зохиол гээд л явдаг байсан. Тэдний дундаас 8 хүн нэгдэж тэгээд одоо бүгдээрээ ямар нэгэн байдлаар утга, уран зохиолтой холбоотой ажил эрхэлж, хувийн уран бүтээлээ орхигдуулаагүй байна гэдэг чинь сайхан хэрэг шүү дээ. Уран зохиолын хүрээнд маш олон бүлэг, бүлгэм үүсгэн байгуулагдсан байдаг. Тэгээд ч уран зохиолын бүлгэм гэдэг маань тамга тэмдэг бүхий хуулийн этгээд бус цэвэр оюун санааны нэгдлийн үр шим байдаг учираас бид насан туршдаа “Хөх мэдрэхүй”-гээрээ овоглоод л дуусах байх. Одоо бид зүгээр нэг уран бүтээлийн андууд гэхээсээ илүүтэй сэтгэл зүрхний нандин холбоотой ахан дүүс болцгоосон доо. Байна уулзаж ярилцаад байж чадахгүй ч хэн хэнийхээ амьдрал, уран бүтээлд үргэлж л санаа тавьдаг даа.

 

Нутагтаа ирсэн сэтгэгдэлээ хуваалцаач?

 

Үнэхээр сайхан байна. Мөрөн хот маань сүүлийн 2-3 жилийн дотор ямар их өөрчлөгдөж байна вэ. Энэ жил хур багатай гандуу, улс даяар эдийн засгийн байдал хүндхэн байгаа ч гэлээ нутгийн олны харцнаас гуниг олж харсангүй. Энэ бас их сайхан юм шүү. Мөн энэ жилийг “Залуучуудын хөгжлийг дэмжих жил” болгон зарласан гэж сонслоо. Мөрөн хотыг унадаг дугуйн замтай болгож, үнэгүй интернет орчинг бүрдүүлнэ гэнэ. Үүнээс илүү сайхан мэдээ гэж юу байх билээ дээ. Намайг ирсэн өдөр гар бөмбөгийн лигийн тэмцээн дуусч байсан. Өмнө нь сагсан бөмбөгийн лигийн тэмцээн явагдсаныг мэдлээ. Энэ мэтчилэн олон ажлыг санаачлаад эхлүүлээд гол нь хэрэгжүүлж, үр дүнг нь үзэж байгаа нь сайхан хэрэг. Ер нь аливаа хөгжил залуучуудын идэвх санаачлага, оролцоон дээр л тулгуурлагдаж байдаг нь нууц биш. Үүнийг олж харсан нутгийнхаа удирдлагуудад талархаж байна.

 

Бидний ярилцах цаг харамсалтай нь богинохон байлаа. Аян замдаа сайн яваарай.

 

Нутаг орон маань өнгөтэй сайхан байна. Удахгүй дахин ирэх байх. Найз маань яалт ч үгүй шалаад байхлаар нь ярилцлага өглөө шүү дээ. Уг нь би энд тэнд ярилцлага өгөөд байх дургүй гэхээсээ илүү ярьж хэлэхдээ тун тааруу хүн байгаа юм.

 

Ингээд тэрээр унаандаа суугаад Улаанбаатарын зүг хөлгийн жолоо залсан юм. Алсрах замын тэртээд араас нь харуулдан зогсохдоо эргээд ирэхэд мөн ч олон зүйлийн талаар ярилцана даа гэсэн бодол тээснээ нуух юун.

Ярилцсан О.Элбэгтөгс

Таньд мэдээлэл таалагдаж байвал like хийнэ үү. Баярлалаа

Ил тод байдал

Сайтын хандалт

Өнөөдөр:   27
Нийт хандалт:   147169
Таны IP:   54.198.210.67