“Тогтвортой аялал жуулчлал 2017” форум боллоо

Нийтэлсэн: 2017-04-17 22:15:21

“Тогтвортой аялал жуулчлал 2017” форум энэ сарын 15 өдөр амжилттай зохион байгуулагдаж өндөрлөлөө. Форумд УИХ-ын гишүүн Л.Мөнхбаатар, Засаг дарга Л.Ганболд, Эрчим хүчний сайдын зөвлөх Ц.Баярбаатар, ЗТХЯ-ны мэргэжилтэн С.Эрдэнэсайхан, БОАЖЯ-ны мэргэжилтэн Ч.Гал, зэрэг яамдын төлөөлөл оролцлоо.

Энэ үеэр салбар яамдын төлөөлөл болон холбогдох албан тушаалтнууд Аялал жуулчлалын салбарын өнөөгийн байдал, цаашдын чиг хандлага, Хөвсгөл аймгийн аялал жуулчлалын үйлчилгээний чанар, стандартын мөрдөлтийн өнөөгийн байдал, Нуурын усны шинжилгээ, ТХГН-ийн талаарх баримтлах бодлого, цаашид хэрэгжүүлэх арга хэмжээ, Хөвсгөл нуур орчмын ус, хөрсний бохирдлын өнөөгийн байдал, аялал жуулчал, дэд бүтэц, аялал жуулчлалын мастер төлөвлөгөө, зэрэг олон асуудлуудын талаар хэлэлцэж мэдээлэл хийсэн байна.

Монгол Улсын Ерөнхий сайд Ж.Эрдэнэбат Хөвсгөл аймагт ажиллах үед Хөвсгөл нуурын байгаль орчинг хамгаалах, аялал жуулчлалын бүс болгон хөгжүүлэхэд цахилгаан эрчим хүчний дэд бүтэц чухал хэрэгтэй байгаа талаар орон нутгийн ард иргэд, аж ахуйн нэгж, нутгийн удирдлага, орон нутгаас сонгогдсон Улсын Их Хурлын гишүүдээс санал хүсэлт гаргасан ба үүний дагуу тооцоо судалгааны ажлууд хийгдсэн талаар Эрчим хүчний сайдын зөвлөх Ц.Баярбаатар мэдээлэлдээ хэлж байлаа.

Мөн Хөвсгөл нуурийн баруун эрэг дагуу бий болох цахилгаан хангамжийн хүрээнд дараах ажлууд хийгдэхээр болсонг хэллээ. 35/15 кВ-ын “Хатгал” дэд станцыг өргөтгөн 15 кВ-ын ЦДАШ-ын шинэ гаргалгаа гарган аялал жуулчлалын баазуудыг тэжээх бэлтгэл ажлыг хангуулах, 35/15 кВ-ын “Хатгал” дэд станцаас нуурын баруун эрэг дагуух аялал жуулчлалын баазуудыг 15 кВ-ын 1.0 МВт хүртэл чадлын нөөцтэй 40 км цахилгаан дамжуулах агаарын шугам автомашины замын трассын дагуу барих, Хөвсгөл нуурын баруун эрэг, Тойлогт багт 15/0.4 кВ-ын “Тойлогт” дэд өртөөг барьж аялал жуулчлалын баазуудыг хэсэгчлэн цахилгаан эрчим хүчээр хангах зэрэг ажлуудыг хийж гүйцэтгэнэ гэлээ.