МОНГОЛ УЛСАД АНХ УДАА УСАН ДООГУУР ШИЛЭН КАБЕЛ ТАВИГДЛАА

Японы “Өү Си Си” компанийн үйлдвэрлэсэн далайн шилэн кабелийг Хөвсгөл нуурын аялал жуулчлал, байгалийн цогцолбор газрын Хүзүүвчийн шил, Жанхайн даваа орчимд нуурын хөвөө дагуу суурилуулан, аялал жуулчлалын бүс нутагт өндөр хурдны интернэт, IPTV, суурин утасны үйлчилгээг нэвтрүүллээ. Япон Улсын “KDDI сан” бүтээгдэхүүн нийлүүлэгчээр Япон Улсын “Өү Си Си” компани, гүйцэтгэгчээр нь Онцгой байдлын ерөнхий газар, “Монголын цахилгаан холбоо” ХК, “Радио телевизийн үндэсний сүлжээ” УТҮГ тус тус ажиллав. Төсөл хэрэгжсэнээр Хөвсгөл аймгийн Цагаан-Үүр, Хатгал тосгонд гамшгийн үеийн дохиог хүлээн авах, дамжуулах станцыг тус тус суурилуулж, бүс нутгийн 650 өрхөд дохио хүлээн авах төхөөрөмжийг хүлээлгэн өглөө. Ийнхүү ямарваа нэгэн гамшиг ослын үед аюулт үзэгдлийг 8 километрийн зайд дохио хүлээн авч сэрэмжлүүлэх боломж бүрдлээ. Хөвсгөл аймгийн Засаг дарга Пилжээгийн Лхагважав “Fm өргөн нэвтрүүлгийн сүлжээ ашиглан гамшгийн үеийн мэдээ, мэдээлэл дамжуулах EWBS систем нэвтрүүлэх” төслийг хэрэгжүүлсэн төслийн багийнханд талархал илэрхийлж, хамтын ажиллагааг улам өргөжүүлж ажиллах талаар санал солилцлоо.