Азийн Хөгжлийн Банкны Монгол Улс дахь Суурин төлөөлөгч Шэннон Коулин, Азийн Хөгжлийн банкны Манила хот дахь төв оффисын Гадаад харилцааны газрын мэргэжилтэн Эстер Яанг, Пима Магамасбад, Азийн Хөгжлийн Банкны Монгол Улс дахь Суурин төлөөлөгчийн газрын мэргэжилтнүүд, хэвлэл мэдээллийн багийн хамт Хөвсгөл аймагт 2023 оны 08 дугаар сарын 23, 24-нд ажиллаж, хэвлэлийн аян зохион байгуулж байна. Энэхүү хэвлэлийн аяны хүрээнд Суурин төлөөлөгч Шэннон Коулин Хөвсгөл аймгийн Засаг дарга П.Лхагважав болон орон нутгийн удирдлагуудтай уулзаж Азийн Хөгжлийн Банкны санхүүжилттэй хэрэгжиж буй төслүүдийн хэрэгжилтийн үр дүн, цаашдын хамтын ажиллагааны талаар санал солилцлоо.Мөн Хөгжлийн бэрхшээлтэй иргэдэд зориулсан хөгжлийн төвөөр зочилж, 10 мегаваттын хүчин чадалтай нарны эрчим хүчний станцын барилгын ажилтай танилцлаа.Хөгжлийн бэрхшээлтэй иргэдэд зориулсан хөгжлийн төв нь ирэх 9 дүгээр сард нээлтээ хийн иргэддээ үйлчилж эхлэх бөгөөд хүүхдийн сэргээн засах тусламж үйлчилгээ, насанд хүрэгчдэд үзүүлэх тусламж үйлчилгээ гэсэн үндсэн хоёр чиглэлд үйл ажиллагаа явуулна. Суурин төлөөлөгч Шэннон Коулин 2023 оны 08 дугаар сарын 24-ний өдөр Хөвсгөл аймгийн Хатгал тосгонд зочилж “Хөвсгөл нуурын байгалийн цогцолборт газарт иргэдийн амьжиргааг дээшлүүлэх, аялал жуулчлалыг тогтвортой хөгжүүлэх нэгдсэн төсөл” болон “Тогтвортой аялал жуулчлалыг хөгжүүлэх төсөл”-ийн үйл ажиллагаатай танилцана. Азийн Хөгжлийн Банкны Монгол Улсад хэрэгжүүлж буй үйл ажиллагаа нь хүртээмжтэй нийгмийн хөгжил ба эдийн засгийн боломжуудыг дэмжих, уур амьсгалд тэсвэртэй дэд бүтцийг хөгжүүлэх, мөн ногоон бөгөөд уур амьсгалд зохицсон тогтвортой хөгжлийг цогцлооход чиглэдэг бөгөөд Хөвсгөл аймгийн хэмжээнд 2000 оноос хойш 20 орчим хөнгөлөлттэй зээл, буцалтгүй тусламжийг үзүүлсэн байна. Хэвлэлийн баг нь Үндэсний мэдээллийн МОНЦАМЭ агентлаг, Өнөөдөр сонин, “Тогтвортой хөгжлийн төлөө” сэтгүүлчдийн клуб болон iToim сайтын сэтгүүлчдээс бүрдэж байгаа бөгөөд Азийн Хөгжлийн Банкны санхүүжилттэй хэрэгжсэн болон хэрэгжиж буй төсөл хөтөлбөрийн үр дүн, төслийн үр шимийг хүртэгчтэй ярилцан дэлгэрэнгүй сурвалжилга, нийтлэл, ярилцлага бэлтгэн олон нийтэд танилцуулах юм.