Хөвсгөл аймгийн Засаг дарга Пилжээгийн Лхагважав Холбооны Бүгд Найрамдах Герман Улсын Барут/ Марк хотын дарга Петер Илк, Хөгжлийн бодлогын зохицуулагч Карстен Виттке болон тус хотын Иргэдийн Хурлын дарга Михайл Эбл нарыг хүлээн авч уулзлаа. Мөрөн хот болон ХБНГУ-ын Барут/Марк хотын хамтын ажиллагаа 2011 оноос эхэлсэн бөгөөд уулзалтаар хоёр хотын олон жилийн хамтын ажиллагааны ач холбогдол, хэрэгжүүлж ирсэн төсөл хөтөлбөрүүдийн талаар санал солилцлоо. ХБНГУ-ын Барут/Марк хотын дарга Петер Илк хэлэхдээ: Мөрөн хотод сүүлийн гурван жилийн хугацаанд “Мөрөн хотын хог хаягдлын тогтвортой менежментийг сайжруулах нь” төслийг хэрэгжүүлж төслийн үр дүнг хэлэлцэж, тус төслийн хаалтыг хийх гэж байна. Мөн цаашид ойн аж ахуй, усны менежментийг сайжруулах, байгаль орчин, ойжуулалтын мэргэжлийн боловсон хүчнийг сургах, хоёр хотод харилцан туршлага судлах чиглэлээр цаашдын хамтын ажиллагаагаа үргэлжлүүлэх хүсэлтэй байгаагаа илэрхийлж байлаа.