Францын найруулагч, гэрэл зурагчин Хамид Сардар Монгол орны тухай, онгон дагшин байгаль, түүнийг хамгаалж буй байгаль хамгаалагчийн тухай өгүүлсэн “Баавгайн хөндий” баримтат киног 2022 онд бүтээсэн байна. Энэхүү баримтат кино олон улсын кино сонирхогчид төдийгүй олон нийтийн анхаарлыг татаж, шилдэг бүтээлээр шалгарч дэлхийн нэр хүндтэй олон улсын кино наадмуудаас 22 удаагийн цом, шагнал хүртэж өндөр амжилт үзүүлсээр байна. Энэ киногоор дамжуулан Монгол Улсын байгаль хамгааллын салбарт байгаль хамгаалагчийн ур чадвар, амьдралын арга ухаанаар бүтсэн жишиг болохуйц “байгаль хамгааллын загвар”-ыг гарган ирж дэлхийд таниулж байгаа нь киноны үндсэн ач холбогдол үнэ цэнэ юмаа гэж үзэж байна. Дэлхийн уушиг болсон 5 тивийн ойн санг хүн төрөлхтөнд өвлүүлэн үлдээхийн төлөө тэмцэж буй байгаль хамгаалагчдын амьдралаар сэдэвлэн бүтээсэн уг кинонд Монгол Улсын Байгаль орчны гавьяат ажилтан, байгаль хамгаалагч Ж.Төмөрсүх ах гол дүрийг бүтээжээ. Ж.Төмөрсүх ах бол байгаль хамгаалах үйлсэд 40 гаруй жилийн хөдөлмөрөө зориулж, тусгай хамгаалалттай газар нутгийн сүлжээг өргөтгөх, хамгаалалтын захиргааг бэхжүүлэх, боловсон хүчнийг чадавхжуулах, тогтвортой аялал жуулчлалыг хөгжүүлэхэд идэвх санаачилга гарган ажиллаж байгаа байгаль хамгаалах салбарын томоохон зүтгэлтэн билээ. Уг киног бүтээсэн уран бүтээлчид, Хөвсгөл аймгийн Улаан тайгын хамгаалалтын захиргааны хамт олонд баяр хүргэж, ажлын амжилт хүсье.