Батлан хамгаалах яамны дэд сайд Б.Баярмагнай, Барилга хот байгуулалтын дэд сайд Э.Золбоо Хөвсгөл аймгийн Цагааннуур, Ренчинлхүмбэ сумдад ажиллаж Засгийн газрын бодлого, үйл ажиллагаа, түүнээс гарсан үр дүнгийн талаар мэдээлэл өглөө.Тухайлбал Засгийн газраас дэвшүүлсэн “Шинэ сэргэлтийн бодлого”, аймаг орон нутгийг бүсчилж хөгжүүлэх нь нийгэм эдийн засаг хийгээд иргэдэд ямар үр өгөөжтэй болохыг тайлбарлалаа.Бүсчилсэн хөгжлийн үзэл баримтлалаар хойд бүсийн хувьд ирээдүйд шинжлэх ухаан технологи, аялал жуулчлалын чиглэлд тулгуурлан хөгжих боломжтой гэж томьёолсон. Ингэж хөгжихөд мал аж ахуй, байгалийн үзэсгэлэнт тогтоц зэрэг нөөц, боломж бүрэн бий. Монгол Улсын эдийн засагт хэдийнээ гэрэл ассан. Ганцхан тоо баримт дурдахад Шинэ сэргэлтийн бодлого хэрэгжиж эхэлснээр ДНБ 2021 онд 43.6 их наяд төгрөг байсан бол 2023 оны байдлаар 69 их наяд төгрөг, экспортын орлого 9.2 тэрбум ам.доллараас 15.2 тэрбум ам.доллар, нүүрсний экспорт 16.1 сая.тн-оос 70 сая.тн-д хүрснээс гадна Монгол Улс өрийн дарамтаас гарсан. Энэ өсөлтийг 2024 онд хадгална гэсэн өөдрөг төсөөлөлтэй байна.Уулзалтын үеэр намын гишүүд Засгийн газрын авлигатай хийж буй тэмцэл гал унтраагаад өнгөрдөг байж болохгүйг бүх шатандаа анхаарахыг хүссэн. Мөн Цагааннуур сумын ЕБС-ийн барилгын ажлыг дуусгах, шинэ Соёлын төв, Ахмадын өргөө нэн шаардлагатай байгааг намын гишүүд уламжилж байв. Дээрх асуудлыг судалж, санал хүсэлтийг холбогдох албан тушаалтанд хүргэхээр боллоо. Хот, хөдөөгийн сэргэлтийг дэмжих зорилтын хүрээнд улсын төсвийн хөрөнгө оруулалтаар нэн шаардлагатай сургууль, цэцэрлэг, эмнэлэг, дотуур байр, соёлын төв, музей, театр спорт заал, цогцолборын бүтээн байгуулалт олноор хийгдэж, эрүүл мэнд, боловсрол, соёлын үйлчилгээ иргэдэд илүү хүртээмжтэй хүрэх боломж бүрдэж буй. Иймд нутгийн иргэдийн уламжилж буй асуудал шийдвэрлэгдэх бүрэн боломжтой гэж харж байна.