НҮБ-ын Хүн амын сангийн Шадар суурин төлөөлөгч Л.Оюунаа даргаар ахлуулсан баг манай аймагт 5-р сарын 3-7 ныг хүртэлх хугацаанд аймгийн төв болон Ренчинлхүмбэ, Цагааннуур сумдад ажиллахаар ирж ажлын хэсгийг аймгийн Засаг дарга П.Лхагважав, Засаг даргын Тамгын газрын дарга Б.Батбилгүүн болон Эрүүл мэнд боловсролын салбарын удирдлагууд хүлээн авч уулзалт зохион байгууллаа.

НҮБ-ын Хүн амын сангаас Бэлгийн болон нөхөн үржихүйн эрүүл мэнд, нөхөн үржихүйн эрхийн хүрээнд Люксембургийн Засгийн Газрын санхүүжилтээр НҮБ-ын Хүн амын сангаас 5 жилийн хугацаанд хэрэгжүүлэх “Эхийн болон төрөх тойрны сэргийлж болох эндэгдлийг тэглэх үйл ажиллагааг эрчимжүүлэх нь” төслийг Эрүүл Мэндийн Яамтай зөвшилцөн Булган, Хөвсгөл аймгуудыг сонгон уг төслийг хэрэгжүүлэхээр болсон тухай танилцууллаа.Энэхүү төслийн хүрээнд “Дэлгэрмөрөн” Цогцолбор сургуульд Эрүүл мэндийн боловсролын хичээлийг интерактив дэлгэцээр заах, нөхөн үржихүйн эрүүл мэндийн үйлчилгээг сайжруулж, орон нутгийн өсвөр үеийнхэнд илүү сонирхолтой болгох ажлыг эхлүүлэх,ухаалаг самбар суурилуулах, Ренчинлхүмбэ, Цагаануур сумдын Эрүүл мэндийн төвд цахим хурлын төхөөрөмж, сургуулийн дотуур байрны хүүхдүүдтэй уулзаж, охидын багц гардуулан хамтран ажиллахаар болсон байна. Мөн НҮБ-ын Хүн амын сангийн Монгол дахь суурин төлөөлөгчийн газар нь 2019 оноос хойш ЮНИТЕЛ групптэй хамтын ажиллагаагаа хөгжүүлж, орон нутгийн залуучуудын хөгжлийн төвүүдэд "Мандухай" чатбот, "Дижитал номын сан – Юнителийн төвүүд" зэрэг санаачилгуудаар дамжуулан залуучуудыг чадавхжуулахад нэн тэргүүнд анхаарч ажиллахаар болж манай аймгийн Залуучуудын хөгжлийн төв, Unitel Hub төвд ажиллаж байна. Орон нутагт уг төслийг хэрэгжүүлэх болсонд аймгийн удирдлагын хувьд баяртай байгаагаа илэрхийллээ.