ТӨРИЙН БОДЛОГО, ШИЙДВЭРИЙН 2024 ОНЫ ХЭРЭГЖИЛТЭД ХЯНАЛТ-ШИНЖИЛГЭЭ ҮНЭЛГЭЭ ХИЙСЭН ТАЙЛАН

2025 оны 03 дугаар сарын 10-ны өдөр

НЭГ. ХЯНАЛТ-ШИНЖИЛГЭЭ, ҮНЭЛГЭЭНИЙ ЗОРИЛГО

Төрийн бодлого, шийдвэрийн 2024 оны хэрэгжилтийг тооцох,  дүгнэлт зөвлөмж гаргах, хэрэгжүүлсэн үйл ажиллагаа, шийдвэр нь үр дүнтэй байсан эсэх, гарсан алдаа, дутагдлыг арилгах, хэрэгжилт тайлагналтыг сайжруулж, улмаар түүний үр дүн, үр нөлөөг нэмэгдүүлэхэд үнэлгээний зорилго оршино.

ХОЁР. ХЯНАЛТ-ШИНЖИЛГЭЭ, ҮНЭЛГЭЭНИЙ ҮНДЭСЛЭЛ, АРГА ЗҮЙ

Монгол Улсын Засгийн газрын 2020 оны 206 дугаар тогтоолд 2021 оны 374 дүгээр тогтоолоор нэмэлт өөрчлөлт оруулан баталсан “Бодлогын баримт бичгийн хэрэгжилт, захиргааны байгууллагын үйл ажиллагаанд хяналт-шинжилгээ, үнэлгээ хийх нийтлэг журам”-ыг үндэслэл болгож хяналт-шинжилгээ, үнэлгээ хийж, тохирох аргачлалаар үнэлсэн болно.

ГУРАВ. ХЯНАЛТ-ШИНЖИЛГЭЭ, ҮНЭЛГЭЭНИЙ ҮР ДҮН

Аймгийн хэмжээнд 2024 онд 270 хууль тогтоомж, тогтоол шийдвэр, Засгийн газрын үйл ажиллагааны хөтөлбөрийн 18 заалт, Засгийн газрын гишүүн аймгийн Засаг даргатай байгуулсан 19 гэрээний нийт 719 арга хэмжээ, Монгол Улсын хөгжлийн бодлого, төлөвлөлтийн баримт бичигт туссан Засгийн газрын тэргүүлэх ач холбогдолтой төсөл, арга хэмжээнүүдэд хяналт шинжилгээ үнэлгээ хийлээ.

Үнэлгээ тус бүрийг хүснэгтээр харуулбал:

1.Хууль тогтоомж, тогтоол шийдвэрийн хэрэгжилт:

Засгийн газрын хяналт-шинжилгээ, үнэлгээний цахим санд байршуулсан Хөвсгөл аймагт хамааралтай хууль тогтоомж, тогтоол шийдвэрийн нийт 270 заалтыг хяналтад авч сар бүр тайлагнан ажилласан байна. 2024 оны жилийн эцсийн байдлаар хууль тогтоомж, тогтоол шийдвэрийн хэрэгжилт 88.21 хувьтай буюу “Хэрэгжих шатанд” гэж дүгнэгдэж хүргүүлсэн.

Хяналтад авсан заалтууд:

Хөвсгөл аймгийн Засаг даргын эрхлэх асуудлын хүрээнд хамаарах хууль тогтоомж, тогтоол шийдвэрийн хэрэгжилтийг 2023 оны жилийн эцсийн хэрэгжилттэй харьцуулахад 1.55 пунктээр буурсан үзүүлэлттэй байна.

Хууль тогтоомж тогтоол шийдвэрийн хэрэгжилт хангалтгүй 15, хэрэгжээгүй 7 арга хэмжээ тус бүрийг хяналтад авч гүйцэтгэл үр дүнг сайжруулах шаардлагатай.

2.Засгийн газрын үйл ажиллагааны хөтөлбөрийн хэрэгжилт:

Засгийн газрын хяналт-шинжилгээ, үнэлгээний цахим санд байршуулсан Хөвсгөл аймагт хамааралтай Засгийн газрын үйл ажиллагааны хөтөлбөрийн 18 арга хэмжээг хяналтад авч сар бүр тайлагнан ажилласан байна. 2024 оны хагас жилийн байдлаар Засгийн газрын үйл ажиллагааны хөтөлбөрийн хэрэгжилт 78.12 хувьтай буюу “Хэрэгжих шатанд” гэж дүгнэсэн байна.

3.Хөвсгөл аймгийн Засаг даргаас салбарын сайд нартай байгуулсан хамтран ажиллах гэрээний хэрэгжилт:

Хөвсгөл аймгийн Засаг даргаас 2024 онд салбарын нийт 19 сайдтай хамтран ажиллах гэрээ байгуулж, 719 арга хэмжээг хяналтад авч ажилласан байна.

2024 онд байгуулсан гэрээнүүдийн үүргийн биелэлтэд хяналт-шинжилгээ, үнэлгээ хийхэд дунджаар 90.6%-ийн үнэлгээтэй дүгнэгдсэн нь 2023 оны дундаж үнэлгээнээс 1.86 пунктээр буурсан үзүүлэлттэй байна.

 2024 оны биелэлтийн товчоолол:

4. Монгол Улсын хөгжлийн бодлого, төлөвлөлтийн баримт бичигт туссан Засгийн газрын тэргүүлэх ач холбогдолтой төсөл, арга хэмжээний гүйцэтгэлийн үнэлгээ:

Монгол Улсын хөгжлийн бодлого, төлөвлөлтийн баримт бичигт туссан Засгийн газрын тэргүүлэх ач холбогдолтой төсөл, арга хэмжээний гүйцэтгэл 93.1%-ийн биелэлттэй байна. Үүнээс

• Ногоон байгууламж 85.7%
• Цахим шилжилт 100%
• Хог хаягдал 92.8%

4.1.Ногоон байгууламж:

Аймгийн Засаг даргын санаачилсан “Мод тарьж ногоон суварга босгоё” аяны хүрээнд 2024 онд 1,172,113 ширхэг мод тарьж ургуулах төлөвлөгөөтэй ажилласан.  Үүнээс:

1. Хавар, намрын “Бүх нийтээр мод тарих үндэсний өдөр”-өөр айл өрх, аж ахуй нэгжийн хашаанд 19,493 ширхэг мод бут тарьсан.
2. Ойн мэргэжлийн байгууллагын өөрийн хөрөнгөөр хийх ойжуулалтад доройтсон ойг нөхөн сэргээхэд 539,850 ширхэг 2-3 настай шинэс модны тарьцаар ойжуулсан.
3. Улсын төсвийн хөрөнгөөр байгалийн сэргэн ургалтад туслах ажлаар 352,000 ширхэг Шинэс модны тарьц тарьсан.
4. Ногоон байгууламжид нийтийн эзэмшлийн цэцэрлэгт хүрээлэнд 17,661 ширхэг мод бут тарьсан бөгөөд нийт 919,203 ширхэг мод тарьж нийт 2024 оны төлөвлөгөөний биелэлтийг 85.7% -тай гүйцэтгэсэн байна.

4.2.Цахим шилжилт:   

Цахим шилжилтийн бэлэн байдлын үнэлгээгээр Хөвсгөл аймаг “Түвшин 2”-т үнэлэгдсэн нь орон нутагт цахим шилжилтийг эрчимжүүлэх бэлэн байдал хангагдсан, удирдлагын манлайлал сайн, албан хаагчид цахим шилжилтийг эрчимжүүлэх талаар арга хэмжээ авч ажилласан байна.

Хөвсгөл аймгийн иргэдийн Төлөөлөгчдийн хурлын 2023 оны 13 дугаар тогтоолоор батлагдсан “Цахим Хөвсгөл” хөтөлбөрийн хэрэгжилтийг хангах ажлын хүрээнд төрийн байгууллагын цахим шилжилтийг эрчимжүүлэх зорилгоор аймгийн иргэдийн Төлөөлөгчдийн Хурлын үйл ажиллагаанд зориулж цаг хугацаа орон зайнаас үл хамааран хуралдаа цахимаар оролцох боломж нөхцөлийг бүрдүүлж 41 төлөөлөгчид зөөврийн компьютер, 41 ухаалаг микрофон, цахим хуралдааны тоног төхөөрөмжийг шийдвэрлэжээ.

Төрийн үйлчилгээг иргэнд түргэн шуурхай хүргэх зорилгоор  “Хурдан” төвийн  11 цэгийг тохижуулан үйл ажиллагааг нь жигдрүүлэн ажилласан байна.

Өөртөө үйлчлэх төрийн цахим үйлчилгээний смарт “ХУРДАН” цэг байгуулж улмаар орон нутгийн хэмжээнд төрийн үйлчилгээг хүн, хуулийн этгээдэд цахим хэлбэрээр хүртээмжтэй хүргэх боломжийг нэмэгдүүлэх зорилгоор 3 киоск машиныг Засаг даргын тамгын газар, Хөгжлийн бэрхшээлтэй хүний хөгжлийн төв, Хатгал тосгонд байршуулсан бөгөөд ингэснээр төрийн үйлчилгээг хурдан шуурхай хүргэх боломж бий болсон байна.

Мөн аймгийн төвд Теле хяналт 24/7 смарт төвийг шинээр байгуулж уг байранд төрийн цахим үйлчилгээний хэлтсийг байрлуулж бүх үйлчилгээг нэг дороос хүргэж ажилласан байна.

Төрийн үйлчилгээг цахим хэлбэрээр үзүүлэхтэй холбоотой стандартыг мөрдүүлэх, үйлчилгээний соёлыг хэвшүүлэхэд анхааран ажиллаж Төрийн цахим үйлчилгээний зохицуулалтын газрын даргын 2023 оны  А/28 дугаар тушаалаар батлагдсан “ХУРДАН” цэгийн үйл ажиллагааны түр журам, Төрийн үйлчилгээг операторын горимоор үзүүлэхэд тавигдах ерөнхий шаардлага стандарт MNS 6984:2022 хэрэгжилтийг хангасан байна.

Аймгийн Засаг даргын эрхлэх хүрээний агентлаг, байгууллага, сумдын Засаг даргын Тамгын газар болон холбогдох нийт 236 төрийн байгууллагуудыг төрийн байгууллагуудын дотоод үйл ажиллагааны удирдлагын нэгдсэн систем "ERP" системд холбож мэдээ тайланг цахимд шилжүүлэн ажиллаж байна.

Мөн 58 дугаар тогтоолын хүрээнд нийт төрийн байгууллагуудын холбогдох албан хаагч нарт цахим албан хэрэг хөтлөлтийн системийг албан бичиг солилцооны дундын систем “DOCX”-д холбох сургалтыг зохион байгуулан ашиглах чиглэлийг өгч, нийт 210 төрийн байгууллага “DOCX” системд холбогдон үйл ажиллагаандаа ашиглаж байна.

Мөн албан тушаалын тоон гарын үсгийг 110 байгууллага авч албан бичгийг цахим хэлбэрээр боловсруулан баталгаажуулан илгээн ажилласан.

Нийтийн мэдээллийн ил тод байдлын тухай хуулийн хэрэгжилтийг хангаж, нээлттэй мэдээллийг www.shilen.gov.mn цахим хуудсаар дамжуулан олон нийтэд хүргэх зорилгоор “Цахим орчинд зөв байя” улсын 3 дугаар аяны хүрээнд shilen.gov.mn сайтын мэдээлэл хариуцсан ажилтны сургалтыг Хөвсгөл аймагт зохион байгуулж 44 төрийн байгууллагын 44 албан хаагч хамрагдлаа. Мөн операторуудыг 5 хоногийн сургалтад хамруулж нийтийн мэдээллийн ил тод байдлыг хариуцлагатайгаар хэрэгжүүлэн ажиллаж байна.

2024 онд шинээр байгуулагдсан мобиком 18, нийт 23 сайт шинээр хүлээн авч ашиглалт үйлчилгээний хэвийн үйл ажиллагааг ханган ажилласан.

Аймгийн хэмжээнд 23 сум 99 багт харилцаа холбооны дэд бүтцийг хувийн хэвшлийн оролцоотой сүлжээнд холбох ажлыг зохион байгуулж Мобикомын 4G сүлжээг  оруулж ирснээр иргэдийн интернэтэд холбогдох боломжийг нэмэгдүүлсэн байна.

4.3.Хог хаягдлын менежмент:

Хөвсгөл аймгийн хог хаягдлын менежментийг сайжруулах ажлын хүрээнд аймгийн хог хаягдлын менежментийг 2035 он хүртэл сайжруулах Хоггүй Хөвсгөл төслийн баримт бичгийг 2023 онд батлуулж хэрэгжилтийг ханган ажилласан байна.

Аймгийн хэмжээнд: Аймгийн хэмжээнд нийт 12 суманд хог преслэгч төхөөрөмжийг хүлээлгэн өгсөн. Дахин боловсруулах хог хаягдлыг цуглуулах, тээвэрлэхэд зориулж Hundai Porter II машиныг Байгаль орчин аялал жуулчлалын газраас ашиглуулах гэрээгээр сумуудаас дахин боловсруулах дайвар бүтээгдэхүүн цуглуулж, тээвэрлэн Улаанбаатар хот руу нийлүүлдэг иргэн Б.Ганчимэгт хүлээлгэн өгч иргэн Б.Ганчимэг нь 2024 оны Жем интернэшнл ХХК-12.000 ширхэг архины шил, мөн гялгар цаас, уут, зөөлөн хуванцар 5 тн-ыг Од пластикт, Ундаа усны хуванцар сав 6.5 тн-ыг ТИ ЭМ ЭС ХХК-д тус тус нийлүүлсэн 46,5 тн хог хаягдлыг эдийн засгийн эргэлтэд оруулж үр дүнтэй ажилласан байна.

Аймгийн Орон нутгийн хөгжлийн сангийн хөрөнгө оруулалтаар хогийн цэгийг дарж булшлах гинжит эксваторыг Мөрөн хот тохижилт үйлчилгээний төвд хүлээлгэн өгсөн. Ингэснээр Мөрөн хотын хогийн цэгийн үйл ажиллагаа сайжирч хог хүлээн авах талбайг бэлтгэх, өдөрт ирж байгаа хогийг тухайн бүр нь дарж булах боломж бүрдэж байна.

Мөрөн сумын хур хогийн цэгийг 100 га талбайгаар хумьж цэвэрлэв. Аймгийн Орон нутгийн хөгжлийн сангийн хөрөнгө оруулалтаар Мөрөн сумын хог хаягдлын төвлөрсөн цэгийн үйл ажиллагааг сайжруулах тархсан талбайг багасгах, түрж булах, орц гарц гаргах, зогоон татах ажлыг БОАЖЯ-ны санхүүжилтээр 2024 оны 5 дугаар сарын 17-ны өдрөөс 5 дугаар сарын 31- ны хороонд зохион байгуулсан байна

Мөрөн сумын хог хаягдлын төвлөрсөн цэгийн нийт 169 га талбайд тархсан хог хаягдлыг 69 га болгон 100 га-аар хумьж, 12000 тн хог хаягдлыг дарж булсан. Мөн 5 км-ын урттай зогоон татаж хамгаалалтын зурвасыг давхар хийж  гүйцэтгэжээ.

Улс болон аймгийн төсвөөс 412,0 сая төгрөгийг зарцуулж төвлөрсөн хог хаягдлын цэгийг зохион байгуулалтад оруулж 24 цагийн харуул хамгаалалтай болж хөрс болон ус, орчны бохирдлыг бууруулсан үр дүнтэй ажил болсон байна.

Хог хаягдлын чиглэлээр хэрэгжүүлсэн ажлын үр дүн: Хөвсгөл аймгийн хэмжээнд хог хаягдлын төвлөрсөн цэгийн үйл ажиллагааг сайжруулах тархсан талбайг багасгах, түрж булах, зогоон татах, дарж булах ажлыг БОАЖЯамтай хамтран зохион байгуулж нийт 13 сумын 210 га талбайд тархсан хог хаягдлыг хумьж, дарж булсан.  Хамгаалалтын зурвасыг хийж    төвлөрсөн хог хаягдлын цэгийг зохион байгуулалтад оруулж хөрс болон ус, агаар, орчны бохирдлыг бууруулсан байна.

Мөн аймгийн хэмжээнд 21268,8 тонн хог хаягдлыг тээвэрлэж хогийн цэгт хүргэсэн бөгөөд үүнээс 4714 тонн хог хаягдлыг устгаж, 3890 тонн хог хаягдлыг дарж булшлах ажлыг зохион байгуулсан.

Аймгийн хэмжээнд нийтийн эдэлбэр газар, усан сан бүхий газрын эрүүл ахуйн хамгаалалтын бүсэд болон автозамын дагуух хуримтлагдсан хог хаягдлыг цэвэрлэх ажлын хүрээнд:

Хөвсгөл аймгийн 23 сум 1 тосгоны хэмжээнд 16300 га талбайг хамарсан 1553 тн хог хаягдлыг хаврын бүх нийтийн хог цэвэрлэгээгээр цэвэрлэсэн. Үүнээс суурин газрын 9317 га талбайг хамран 621,1 тн хог хаягдал, 71 тооны гол горхи, булаг шандын 1248 га талбайгаас 139,3 тн хог хаягдал, айл өрхийн гудамж талбайн 3440 га талбайгаас 606 тн хог хаягдал, улсын болон орон нутгийн зам дагуух 2295 га талбайгаас 186,8 тн хог хаягдлыг тус тус цэвэрлэсэн. Уг цэвэрлэгээнээс 2тн хуванцар, 1.5 тн лааз, 2 тн шил, 3 тн бусад дахин ашиглах боломжтой хог хаягдлыг цуглуулан ангилан хоёрдогч түүхий эд цуглуулах цэгт тушаасан. Тус ажилд 12814 төрийн албан хаагч, 4327 иргэн, 828 аж ахуйн нэгж байгууллага хамрагдаж оролцсон. 291 ширхэг тээврийн хэрэгсэл ашиглан цуглуулсан хог хаягдлыг төвлөрсөн хогийн цэгт тээвэрлэсэн байна.

 ДӨРӨВ. ЗӨВЛӨМЖ

Монгол Улсын Засгийн газрын 2020 оны 206 дугаар тогтоолд 2021 оны 374 дүгээр тогтоолоор нэмэлт өөрчлөлт оруулан баталсан “Бодлогын баримт бичгийн хэрэгжилт, захиргааны байгууллагын үйл ажиллагаанд хяналт-шинжилгээ, үнэлгээ хийх нийтлэг журам”-ын дагуу Төрийн бодлого, шийдвэрийн 2024 оны хэрэгжилтэд хяналт-шинжилгээ, үнэлгээ хийж дараах зөвлөмжийг хүргүүлж байна.

1. ХУУЛЬ ТОГТООМЖ, ТОГТООЛ ШИЙДВЭРИЙН ХЭРЭГЖИЛТИЙН ХҮРЭЭНД:

Хууль тогтоомж, тогтоол шийдвэрийн хэрэгжилтийг Засгийн газрын хяналт хэрэгжүүлэх газраас хяналт шинжилгээ хийсэн бөгөөд аймгийн хэмжээнд 88,1 хувьтай үнэлсэн үнэлгээ 74%, болж 14,2 пунктээр үзүүлэлт буурсан байна. Иймд 2024 оны буурсан үзүүэлэлт тус бүрийг тайлбарын хамт цахимаар хүргүүлэх тул 2025 оны тайлагналтад алдааг давтахгүй байх тал дээр анхаарч ажиллах,

Мөн тус үнэлгээгээр “Хэрэгжээгүй”  0 заалттай 22 арга хэмжээ байгаа нь тухайн зорилтыг хэрэгжүүлэхэд шаардлагатай тооцоо судалгаа, бэлтгэл ажил хийгдэж боловсруулалтын шатанд байгаа болон тухайн зорилтыг хэрэгжүүлэх талаар ямар нэгэн ажил зохион байгуулаагүй байна. Үүнд анхаарч тооцоо судалгааг хийх,

 Хэрэгжилт удаашралтай, гүйцэтгэл хангалтгүй байгаа заалтуудын бодит үр дүнг нэмэгдүүлэх тал дээр санал, санаачилга гарган хамтран хэрэгжүүлэгч байгууллагуудтай уялдаатай ажиллаж гүйцэтгэлийг чанаржуулах, бодит үр дүнг нэмэгдүүлэх,

Хэрэгжиж дууссан, хугацаатай өгөгдсөн, цаг хугацааны хувьд ач холбогдолгүй болсон заалтуудыг нэг бүрчлэн тооцож хасуулах саналыг ирүүлэх, тайланд зөвхөн үр дүнг 2000 тэмдэгтэд багтаан тодорхой тайлагнахыг анхаарах,

Улсын төсвөөс оруулж буй хөрөнгө оруулалт болон бусад төсөл хөтөлбөр, зээл тусламж, дэмжлэгийг зориулалтын дагуу үр ашигтай үргэлжлүүлэн хэрэгжиж байгаа хэсэгт холбогдох салбарын төрийн байгууллага хяналт тавих,

 Хуулийн заалтын хэрэгжилтийг хангасан үйл ажиллагааг тайлагнаагүй, тодорхой баримт бичгийг ирүүлээгүй байгаад анхаарч баримт нотолгоотой тайлагнах,

Хэрэгжилтийг давтан тайлагнасан алдаа олон гарч байгаад анхаарч дахин давтахгүй байх,

Хэрэгжилтийг хэт ерөнхий, хэмжигдэхүйц бусаар тайлагнасан бөгөөд  хэмжигдэхүйц байх гэдэг нь зорилт, арга хэмжээний гүйцэтгэлийг тодорхой тоон болон чанарын үзүүлэлтээр үнэлж, хэмжих боломжтой байхаар тайлагнах,

Хууль тогтоомжийн хэрэгжилтэд зохион байгуулалтын арга хэмжээг авч, бодит үр дүн гаргах тал дээр санаачилгатай ажиллах,

Салбарын чиглэлээр батлагдсан журмын хэрэгжилтийг ханган ажиллах тал дээр арга хэмжээ авч ажиллаагүй, тодорхой ажил зохион байгуулаагүй байгаа бөгөөд хэрэгжүүлэх арга хэмжээний төлөвлөгөө боловсруулан хэрэгжилтийг ханган ажиллах

Хууль, тогтоомж, тогтоол шийдвэрийн хэрэгжилтийн 2024 оны биелэлтийг Засгийн газрын хяналт хэрэгжүүлэх газраас дүгнэж ирүүлсэн бөгөөд үнэлгээ бууруулж тайлбар ирүүлсэн хэрэгжилтийг файлаар өгөх тул дараагийн тайлагналтад уг алдааг давтан гаргахгүй тал дээр анхаарч ажиллах шаардлагатай.

2. ЗАСГИЙН ГАЗРЫН ҮЙЛ АЖИЛЛАГААНЫ ХӨТӨЛБӨРИЙН ХЭРЭГЖИЛТИЙН ХҮРЭЭНД:

2024 онд Засгийн газрын үйл ажиллагааны хөтөлбөрийг цахим санд хагас жилээр тайлагнасан хэдий ч орон нутгийн хэмжээнд жилээр дүгнэж хяналт, шинжилгээ үнэлгээ хийж ажиллах шаардлагатай байсан.

 Иймд 2024-2028 онд хэрэгжүүлэх Засгийн газрын үйл ажиллагааны хөтөлбөрийг хяналтад авч хагас бүтэн жилээр үр дүнг тооцож холбогдох арга хэмжээг авч ажиллах нь зүйтэй.

Мөн засгийн газрын 2024-2028 хэрэгжүүлэх үйл ажиллагааны хөтөлбөрийг эрчимжүүлэх тухай Монгол Улсын ерөнхий сайдын 2025 оны 02, 03 албан даалгаврыг хяналтад авч үр дүнг тооцож ажиллах шаардлагатай. 

3. ХӨВСГӨЛ АЙМГИЙН ЗАСАГ ДАРГААС САЛБАРЫН САЙД НАРТАЙ БАЙГУУЛСАН ХАМТРАН АЖИЛЛАХ ГЭРЭЭНИЙ 2024 ОНЫ ХЭРЭГЖИЛТИЙН ХҮРЭЭНД:

Хөвсгөл аймгийн Засаг даргаас салбарын сайд нартай байгуулсан хамтран ажиллах гэрээний 2024 оны биелэлтийн товчоолол:

Засгийн газрын Хяналт хэрэгжүүлэх газраас 10 сайдын гэрээнд хяналт хийж  ирүүлсэн байдлыг дээрх товчооллоос харахад үнэлгээ 10-20 пунктээр буурсан үзүүлэлтийг харуулсан байна.

Иймд холбогдох яамдын хамтран ажиллах гэрээний буурсан заалт бүрийг нягталж, дараагийн гэрээний биелэлтэд алдааг давтахгүй байх тал дээр анхаарч ажиллах,

Гэрээг байгуулагдсан өдрөөс эхлэн хяналтад авч, холбогдох агентлаг байгууллагад хүргүүлэн хэрэгжилт үр дүнг тооцон ажиллах,

Гэрээнд тусгагдсан арга хэмжээг холбогдох богино хугацааны баримт бичигт тусгаагүй, санхүүжилтийн эх үүсвэр шаардлагатай бол холбогдох яамтай хамтран төлөвлөгөөнд тусгах, санхүүгийн эх үүсвэрийг шийдвэрлэж ажиллах,

Мөн тайлагналтыг бодит баримт судалгаатай хийх, хамааралгүй арга хэмжээг тайлагнахгүй байх

Гадаад болон дотоодын төсөл хөтөлбөрөөр хэрэгжсэн болон хэрэгжиж байгаа төсөл арга хэмжээний гүйцэтгэлийн хяналтыг сайжруулах, цаашид үр дүнг үргэлжлүүлэх тал дээр салбарын яамдтай хамтран ажиллах, шаардлагатай тохиолдолд хамтран ажиллах гэрээнд тусгуулах санал өгөх,   

Салбарын бодлого хариуцсан мэргэжилтэн нар агентлаг байгууллагаас ирсэн тайлагналтыг бодит үр дүнтэй харьцуулж нягтлах, үнэн зөв тайлагнахад анхаарч, хамтарч ажиллах хэрэгтэй байна.

4. МОНГОЛ УЛСЫН ХӨГЖЛИЙН БОДЛОГО, ТӨЛӨВЛӨЛТИЙН БАРИМТ БИЧИГТ ТУССАН ЗАСГИЙН ГАЗРЫН ТЭРГҮҮЛЭХ АЧ ХОЛБОГДОЛТОЙ ТӨСӨЛ, АРГА ХЭМЖЭЭНИЙ ГҮЙЦЭТГЭЛИЙН ХҮРЭЭНД:

Засгийн газрын тэргүүлэх ач холбогдолтой төсөл арга хэмжээний үнэлгээний хүснэгт 2022-2024 он

Дээрх үнэлгээний хүснэгтээс харахад Засгийн газрын Хяналт хэрэгжүүлэх газрын үнэлгээнээс  аймгийн үнэлгээ 20-60 пунктээр зөрүүтэй үнэлэгдсэн ба буурсан үзүүлэлттэй байна.

Иймд Монгол Улсын хөгжлийн бодлого, төлөвлөлтийн баримт бичигт туссан Засгийн газрын тэргүүлэх ач холбогдолтой төсөл, арга хэмжээг богино хугацааны бодлогын баримт бичигт тусгуулан оны эхнээс хяналтад авч авч хэрэгжүүлэх, бодиттой үнэлэх,

Санхүүжилтийг гадаад дотоодын төсөл хөтөлбөрт тусгуулан шийдвэрлэж ажиллах,

Чиглэл тус бүрээр хэрэгжүүлэх арга хэмжээний төлөвлөгөө боловсруулан үр дүнг тооцох,

2024 оны тайлагналтыг харахад Ногоон байгууламжийн чиглэлээр төсөл боловсруулан, арга хэмжээний төлөвлөгөөг батлан хэрэгжүүлсэн боловч үр дүнг бодит байдлаар дүгнээгүй байна. Иймд ногоон байгууламжийг хэрхэн нэмэгдүүлсэн, тарьсан мод, зүлэгжүүлэлтийн хамгаалалт, усалгаанд анхаарч ажиллах,

Хог хаягдлын чиглэлээр боловсруулсан төсөл арга хэмжээний  тухайн жилийн хэрэгжүүлэх арга хэмжээний төлөвлөгөө боловсруулан үр дүнг тооцож ажиллах,

Цахим шилжилт арга хэмжээний хүрээнд яамныхаа бодлогын хэмжээнд орон нутагт хэрэгжүүлэх арга хэмжээг боловсруулах,

Тухайн жилд хүрэх зорилго, зорилтыг  тодорхойлох, хэт ерөнхий байдлаар тайлагнасан байдлыг засах, үр дүн тодорхой байх,

 Цахим Монгол, Цахим шилжилт хөтөлбөр арга хэмжээг хэрэгжүүлэхэд  төрийн байгууллага болон хувийн хэвшил хоорондын уялдаа холбоог сайжруулах, салбар хоорондын уялдаа холбоог нэгтгэн ажиллах, 

Мөн төрийн байгууллагаас иргэд рүү чиглэсэн цахимжилтыг  сурталчилж иргэд  цахим үйлчилгээг  хэрхэн авч, ямар үр дүнд хүрч байгааг судалгаа тоо баримттай тайлагнах,

Тэргүүлэх ач холбогдолтой төсөл арга хэмжээний гүйцэтгэлийг сайжруулахад олон улсын төсөл, хөтөлбөр, дэмжлэг хэрэгжүүлэх нь үр дүнтэй тул энэ талаар холбогдох төрийн байгууллага идэвх санаачилгатай ажиллах, 

Хөтөлбөр, төлөвлөгөөний хэрэгжилтийг оны эхнээс жигд ханган хэрэгжилтийн явцад тогтмол хяналт тавьж, хэрэгжилт удаашралтай, хангалтгүй арга хэмжээний хэрэгжилтийг эрчимжүүлэх талаар тодорхой арга хэмжээ авч ажиллах,

2025 онд бодлогын арга хэмжээг хэрэгжүүлэхэд шаардагдах санхүүжилт, түүний эх үүсвэрийн тооцоо, судалгаанд үндэслэн бодитой төлөвлөлт хийж  ажиллавал дээрх үзүүлэлтүүдийн хэрэгжилтийг хангах улмаар хэрэгжилт хариуцлага сайжрах бүрэн боломжтой гэж дүгнэж байна.

Цаашид ХШҮ-ний  хэлтсээс тайлант үеийн мэдээлэл бус өмнөх хэрэгжилтийг хуулж тавьсан, бодит үнэлгээ өгөлгүй үнэлгээг өсгөсөн тохиолдолд удирдлага, дээд шатны байгууллагад худал, зөрүүтэй мэдээлэл өгсөн гэж үзэн холбогдох албан тушаалтанд хуулийн дагуу арга хэмжээ авах санал хүргүүлж  ажиллахыг ахнааруулж байна.

ТАНИЛЦСАН:

АЗДТГ-ЫН ДАРГЫН АЛБАН ҮҮРГИЙГ ТҮР ОРЛОН ГҮЙЦЭТГЭГЧ                                Г.ГАНДЭЛГЭР

ХЯНАСАН:

ХЯНАЛТ- ШИНЖИЛГЭЭ, ҮНЭЛГЭЭНИЙ ХЭЛТСИЙН ДАРГЫН АЛБАН ҮҮРГИЙГ ТҮР ОРЛОН ГҮЙЦЭТГЭГЧ                          Д.НЯМЖАВ

ХЯНАЛТ - ШИНЖИЛГЭЭ, ҮНЭЛГЭЭ ХИЙСЭН:

ХЯНАЛТ- ШИНЖИЛГЭЭ,ҮНЭЛГЭЭНИЙ ХЭЛТСИЙН АХЛАХ МЭРГЭЖИЛТЭН                              Б.ОЮУНТУЯА