Мэдээ, мэдээлэл
ЦЭЦЭРЛЭГ СУМЫН МАЛЧИН Д.БЭХБАТЫН ГЭР БҮЛ “УЛСЫН АВАРГА МАЛЧИН” ЦОЛ ХҮРТЛЭЭ
Мэдээ
Төрийн захиргааны удирдлагын хэлтэс
1
2026.02.10
ЦЭЦЭРЛЭГ СУМЫН МАЛЧИН Д.БЭХБАТЫН ГЭР БҮЛ “УЛСЫН АВАРГА МАЛЧИН” ЦОЛ ХҮРТЛЭЭ
XVII жарны “Сүрээр дарагч” хэмээх Гал морин жилийн босгон дээр Цэцэрлэг сумын “Уран хайрхан” багийн малчин Дарамрагчаан Бэхбат, түүний гэргий Түмэндэмбэрэлийн Сарангэрэл нар “Улсын аварга малчин” цол хүртлээ.
Шагналыг Монгол Улсын Их Хурлын гишүүн Л.Мөнхбаатар, аймгийн Засаг даргын зөвлөх Г.Гандэлгэр нар гардуулан өгч, хүндэтгэл үзүүлэв.
Малчин Д.Бэхбат нь Цэцэрлэг сумын Мод толгой, Баян-Уулын дээд дөрөлж хэмээх газруудаар нутаглаж, 30 гаруй жил тасралтгүй мал маллаж, хөдөлмөрлөж ирсэн туршлагатай малчин юм. Тэрбээр улирлын онцлогт тохируулан жилийн дөрвөн улиралд отор нүүдэл хийж, мал сүргээ зөв зохистой маллан, тоо толгой болон ашиг шимийг тогтвортой өсгөж байна.
Аварга малчин Д.Бэхбатын гэр бүл өвөлжөөндөө ногоон тэжээл тариалж, хадлан тэжээлийн бэлтгэлийг урьдчилан хангадаг нь зуд, ган зэрэг байгалийн эрсдэлийг даван туулах чухал нөхцөлийг бүрдүүлдэг сайн туршлага болжээ. Одоогийн байдлаар малын тоо толгой нь 2000 давсан бөгөөд мал аж ахуйн ажилдаа 4 хүнийг тогтмол ажлын байраар ханган, нийгмийн даатгал төлж, цалинжуулан ажиллуулж байна.
Буянт мал сүргийнхээ ашиг шимийг хүртэн “Улсын аварга малчин” хэмээх эрхэм хүндтэй цол хүртсэн танай гэр бүлд чин сэтгэлийн баяр хүргэж, аз жаргал, эрүүл энх, сайн сайхан бүхнийг хүсэн ерөөе.