Дэлхийн Тогтвортой Хөгжлийн Зорилтууд (ТХЗ) нь зөвхөн эх, хүүхдийн эсэн мэнд амьдрахуйн асуудал бус тэдний эрүүл мэнд, сайн сайхан байдлыг хангахад шаардлагатай өргөн хүрээний цогц үйл ажиллагаа юм. Олон Улсын байгууллагууд хамтран “Сэргийлэх боломжтой эх, нярай, хүүхдийн нас баралтыг тэглэх” хэтийн зорилго тавьж, өвөрмөц зорилтуудыг дэвшүүлэн ажиллаж байна. Дэлхий нийтийн энэхүү зорилгод хүрэхийн тулд Оросын Холбооны Улсын Засгийн газрын санхүүжилт, ДЭМБ-ын техникийн дэмжлэгтэйгээр “Эмнэлгийн тусламж, үйлчилгээний чанарыг сайжруулснаар Тогтвортой хөгжлийн зорилтод хүрэх, Эх, нярай, хүүхдийн эндэгдлийг бууруулах” төслийг манай аймагт 3 жилийн хугацаанд хэрэгжүүлэхээр боллоо.Уг төслийг танилцуулах уулзалт өнөөдөр Улаанбаатар хотод болж, уулзалтад Эрүүл мэндийн яамны Төрийн нарийн бичгийн дарга Ц.Эрдэмбилэг, ДЭМБ-ийн Монгол дахь Суурин төлөөлөгч Сергей Диордица,  Хөвсгөл, Баян-Өлгий, Булган Дорноговь аймгийн Замын-Үүд суманд хэрэгжихээр болж тус аймгийн Засаг дарга нар болон ЭМГ-ын дарга, Нэгдсэн эмнэлгийн захирал, холбогдох эмч мэргэжилтнүүд оролцлоо. Төсөл хэрэгжиж байгаа аймгуудад эх, нярай, хүүхдэд эрүүл мэндийн тусламж, үйлчилгээнд нэн шаардлагатай төрөхийн ор, нярайн шарлалтыг хэмжих аппарат, нярайн дулаацуулах ширээ, олон үзүүлэлттэй өвчтөний монитор, тариурын автомат шахуурга, амбу маск, хүүхдийн урт, өндөр хэмжигч, электрон жин, ургийн монитор, хүчилтөрөгч өтгөрүүлэгч зэрэг 12 нэр төрлийн 268,530,000 төгрөгний үнэ бүхий эмнэлгийн хэрэгсэл хуваарилагдаж аймгийн Засаг дарга Ш.Идэрбаясгалан тоног төхөөрөмжийг гардан авлаа. Тус төсөл хэрэгжиж тоног төхөөрөмжөөр хангагдсанаар  Эх, хүүхдийн эрүүл мэндийн тусламж, үйлчилгээний чанарыг сайжруулахад дэмжлэг үзүүлэхээс гадна орон нутагт эрүүл мэндийн тусламж, үйлчилгээг тасралтгүй үзүүлэх, эрсдэлт бүлгийн хүн амын эрүүл мэндийг хамгаалах боломж бүрдлээ.