Монгол цэрэг” -ийн Энхийг сахиулах ажиллагаанд оролцож эхэлсний 20 жилийн ойг тохиолдуулан Хөвсгөл аймгийн ЗДТГ-ын Цэргийн штабаас төрийн цэргийн болон хууль сахиулах байгууллагуудын “Нээлттэй хаалганы өдөрлөг”-ийг зохион байгуулж иргэдэд хууль сахиулах байгууллагуудын үйл ажиллагаа, техник хэрэгслээ танилцууллаа. НҮБ-ын энхийг сахиулах ажиллагаанд монгол цэрэг оролцож эхэлсэн 20 жилийн түүхийн ач холбогдол, оролцоог түгээн дэлгэрүүлэх, үе үеийн энхийг сахиулагчдын байгуулсан амжилт, алдар гавьяа зүтгэлийг алдаршуулах зорилгоор тус “Нээлттэй хаалганы өдөрлөг”- ийг зохион байгууллаа. Цэнхэр дуулгатууд маань Улс орныхоо гадаад нэр хүндийг олон улсын тавцанд өндөр өргөж, даян дэлхийн энх тайван, аюулгүй байдлыг бэхжүүлэхэд жинтэй хувь нэмэр оруулсаар байгааг аймгийн Засаг даргын орлогч М.Хуягбаатар онцлов. Хөвсгөл аймгийн тухайд энхийг сахиулах ажиллагаанд давхардсан тоогоор 52 цэргийн алба хаагч үүргээ нэр төртэй гүйцэтгэсэн нь монгол цэргийн тэр дундаа хоймор нутгийн зон олны бахархал билээ. Хойморь нутгийн цэнхэр дуулгатнууд Монгол Улсын ерөнхийлөгчийн санаачилсан “Тэрбум мод үндэсний хөдөлгөөн”, аймгийн Засаг даргын санаачилсан “Ногоон суварга босгоё” аянд нэгдэж ногоон суварга босголоо.