8 ДУГААР БАГИЙН ИРГЭД ОЙРООС ЭРҮҮЛ МЭНДИЙН ҮЙЛЧИЛГЭЭ АВАХ БОЛОМЖ БҮРДЛЭЭ.

Мэдээ Онцлох мэдээ Нийгмийн бодлогын хэлтэс
2022.11.08
Мөрөн сумын 8 дугаар багийн иргэд болон өрхийн Эрүүл мэндийн төвөөс аймгийн Засаг дарга Шаравдоржийн Идэрбаясгаланд өрхийн Эрүүл мэндийн төвийн үйлчилгээг ойртуулах талаар хүсэлт тавьсныг шийдвэрлэв.
Хүсэлтийг аймгийн Засаг дарга Ш.Идэрбаясгалан хүлээн авч өрхийн Эрүүл мэндийн төвийг нүүлгэн шилжүүлэх талаар Нийгмийн бодлогын хэлтэс, Мөрөн сумын Засаг дарга, Эрүүл мэндийн газарт үүрэг болгосон.
Өгсөн үүрэг чиглэлийн дагуу “Хөвсгөл-Энэрэл” өрхийн Эрүүл мэндийн төвийн 8 дугаар багийн эмч, сувилагч нарыг Мөрөн сумын Засаг даргын Тамгын газрын эсрэг талын байранд байршуулан 2022 оны 11 дүгээр сарын 01-ний өдрөөс үйл ажиллагааг эхлүүллээ. Өнөөдөр аймгийн Засаг дарга Ш.Идэрбаясгалан 8 дугаар багийн иргэдэд үзүүлж буй эрүүл мэндийн үйлчилгээтэй танилцаж, цаашид үйл ажиллагааг тогтмол, чанартай үзүүлэхийг анхаарууллаа. Тухайн багийг хариуцсан эмч сувилагч нар эрүүл мэндийн урьдчилан сэргийлэх үзлэг, оношлогоо,шинжилгээ, гэрийн эмчилгээ, үйлчилгээ, түргэн тусламжийн дуудлага, өдрийн эмчилгээ, сувилгаа, эх нярай, ахмад настан, хөгжлийн бэрхшээлтэй иргэдийн эргэлт хяналт гэсэн үйлчилгээг дагнан үзүүлж байна.
Уг арга хэмжээг түргэн шуурхай шийдвэрлэсэний үр дүнд 8 дугаар багийн иргэд хүйтний улирал болон томуу, томуу төст өвчний дэгдэлтийн үед эрүүл мэндийн үйлчилгээг ойроос, цаг алдалгүй, түргэн, шуурхай авах боломжийг бүрдүүлсэн үр дүнтэй, бодиттой ажил болж чадлаа. Үйл ажиллагаатай танилцах явцад эрүүл мэндийн үйлчилгээ авч буй иргэд болон тус байранд өдөр бүр дасгал хөдөлгөөнд хамрагддаг ахмад настнууд маш их баярлаж байгаагаа аймгийн Засаг даргад талархан хэлж байлаа. Тухайн өрхийн ЭМТ-ийн тогтмол зардал, шаардлагатай тоног төхөөрөмжийн асуудлыг аймгийн Засаг даргын нөөц хөрөнгөөс шийдвэрлэхээр боллоо