Эмнэлгийн тусламж үйлчилгээний чанарыг сайжруулж, Улаанбаатар хотод хийгддэг байсан хавдрын болон улаан хоолой, ходоод, хөх, хэвлийн хөндийн мэс заслуудыг аймагтаа хийдэг болсноор иргэд цаг хугацаа, хөрөнгө мөнгөө хэмнэж, эрүүл мэнддээ анхаарал хандуулах боломж бүрдлээ. Нэгдсэн эмнэлгийн Хүний нөөц, гадаад харилцаа сургалтын албанаас “Үйлчилгээгээ хялбаршуулъя” аяны удирдамжид заасны дагуу нийт албан хаагчдын албан тушаалын тодорхойлолтод дүн шинжилгээ хийж, ажлын ачааллыг бууруулах, чиг үүргийн давхардлыг арилгах зорилгоор албан тушаалын тодорхойлолтыг шинэчлэн боловсруулж байна. Эмчилгээ, үйлчилгээний чанарыг сайжруулах хүрээнд Япон-Монголын хамтарсан эмнэлэгтэй хамтран ажиллахаар болж, эмнэлгийн үзлэгийн ачааллыг бууруулан ажиллаж байна. Иргэдээс хамгийн их гомдол, санал ирүүлдэг Хөдөлмөрийн чадвар алдалтыг тогтоох комиссын хурал (группийн хурал)-ыг иргэдэд илүү хялбар, хүнд суртал чирэгдэлгүй, шударга байдлаар зохион байгуулах чиглэлээр холбогдох судалгааг хийж, үйл ажиллагааны зураглал гаргахаар төлөвлөн ажиллаж байна.  Иргэд, үйлчлүүлэгчид үзүүлдэг төлбөртэй шинжилгээ, лавлагаа(жолооны үнэмлэх шинээр авах, шинээр ажилд орох, ангийн буу эзэмших эрх зэрэг)-ны хураамж, төлбөрийг Нэгдсэн эмнэлгийн Санхүүгийн албанд бэлэн мөнгөөр тушаадаг байсныг тус аяны хүрээнд пос машинаар буюу картаар хүлээн авдаг болсон нь иргэдийн талархлыг хүлээгээд байгаа юм.