Иргэдийн өргөдөл гомдлыг шийдвэрлэхтэй холбогдсон зарим арга хэмжээний тухай” Засгийн газрын 2005 оны 67 дугаар тогтоол, аймгийн Засаг даргын 2006 оны 67 дугаар захирамжаар батлагдсан журмыг баримтлан Хөвсгөл аймгийн Засаг даргын Тамгын газар, 1 тосгон, 23 сумын Засаг даргын Тамгын газар, аймгийн Засаг даргын эрхлэх асуудлын хүрээний 14 агентлаг байгууллагын мэдээ тайланг 2023 оны нэгдүгээр улирлын өргөдөл гомдлын тайланг нэгтгэн гаргалаа.  2023 оны нэгдүгээр улирлын байдлаар Хөвсгөл аймгийн Төрийн байгууллага албан тушаалтанд иргэдээс нийт 1992 өргөдөл, гомдол, санал ирсэн. Үүнээс аймгийн Засаг даргын Тамгын газарт 144 буюу 7,2 хувь, Засаг даргын эрхлэх асуудлын хүрээний агентлагуудад 97 буюу 4,8 хувь, сумдын Засаг даргын Тамгын газрын холбогдох албан тушаалтанд 1751 буюу 88 хувь өргөдөл гомдол тус тус ирсэн байна. Нийт 1992 өргөдөл ирснээс 1904 буюу 95,5 хувийг шийдвэрлэн хариу өгч ажилласан бөгөөд бусад байгууллагад шилжүүлсэн 47 өргөдөл, хугацаа хэтрүүлж шийдвэрлэсэн 31 өргөдөл бүртгэгдсэн байна. Нийт ирсэн өргөдөл гомдлыг зонхилох хувиар нь авч үзвэл Нийгмийн халамжийн үйлчилгээтэй холбоотой, нийгмийн даатгал, газар эзэмшихтэй холбоотой ирсэн өргөдөл зонхилох хувь эзэлж байна.

Аймгийн хэмжээнд ирсэн нийт өргөдлөөс гомдол: 68 буюу 3,4 хувийг эзэлж байна. Гомдлыг дотор нь задалж үзвэл

• 6 буюу 8,8 хувь нь Төрийн албан хаагчийн харилцаа хандлага,
• 9 буюу 13,2 хувийг Төрийн байгууллагын үйл ажиллагааны талаар,
• 24 буюу 35,2 хувийг Нэгдсэн эмнэлгийн үйл ажиллагаатай холбоотой гомдол
• 16 буюу 23,5 хувийг Нийгмийн даатгалын асуудлаар,
• 7 буюу 10,2 хувийг Нийгмийн халамж үйлчилгээний талаар ирүүлсэн бол
• бусад төрлөөр ирсэн гомдол 6 буюу 8,8 хувийг эзэлж байна.

Төрийн албан хаагчийн харилцаа хандлагатай холбоотой гомдлын тухай авч үзвэл  аймгийн Засаг даргын Тамгын газарт 2, бусад сумд агентлаг байгууллагуудад 4 гомдол ирсэн бөгөөд хуулийн хүрээнд судалж, үйл явдлын талаар тодруулга хийж холбогдох мэргэжилтнээс тайлбар аван шаардлагатай гэвэл дараагийн шатны байгууллагад хандах зөвлөмжийг өгч ажилласан байна.Тухайлбал Улаан-Уул сумын Соёо багийн иргэн А.Нансалмаа Тус сумын Засаг дарга Н.Батбаярын гаргасан шийдвэрийг хүлээн зөвшөөрөхгүй гомдолтой байгаа тухайгаа аймгийн Засаг дарга Ш.Идэрбаясгаланд бичгээр гомдол гарган ирүүлсэн бөгөөд иргэний өргөдлийн дагуу судалж дараагийн шатны байгууллагад хандах зөвлөмжийг албан бичгээр хүргүүлсэн байна.

 Аймгийн Засаг дарга долоо хоног бүрийн “Лхагва, Баасан” гарагуудад иргэдээ хүлээн авч уулзаж байна. 2023 оны нэгдүгээр улирлын  байдлаар 22 иргэнийг хүлээн авч уулзаж сонсож ажиллалаа. 

Иргэдээс ирүүлсэн өргөдөл гомдлын заавал хуулийн хугацаа хүлээлгүйгээр шуурхай шийдвэрлэн ажиллах чиглэлийн аймгийн Засаг даргын Тамгын газраас хүргүүлж байна. 2022 оны жилийн эцсийн өргөдөл гомдлын тайланг Засаг даргын дэргэдэх “Удирдлагын зөвлөлийн хурал”-аар хэлэлцүүлж хурлаас гарсан үүрэг даалгаврыг сумд болон агентлаг байгууллагуудад хүргүүлэн ажилласан. Энэхүү үүрэг даалгавраар Иргэдийн өргөдөл гомдлын шийдвэрлэлт шинжилгээ хийх хэрхэн шийдвэрлэсэн талаарх дэлгэрэнгүй мэдээллийг ирүүлж байх, мөнгөн дэмжлэг хүссэн иргэдийн өргөдлийг шийдвэрлэсэн тохиолдолд дэлгэрэнгүй мэдээллийг хамт ирүүлж байхаар тусгасан. Өргөдөл гомдлын шийдвэрлэлтийн хүрээнд дэх ажлуудаас товчхон дурдвал: Улирлын онцлогоос шалтгаалан аймгийн хэмжээнд модны зөвшөөрөл хүссэн иргэдийн тоо  өссөн байна. Мөн газар эзэмших, өмчлөх харилцаатай холбоотой өргөдөл гомдол, газрын маргаантай асуудлын талаар өргөдөл гомдол ихээр ирж байна. Дээрх чиглэлийн өргөдөл гомдлыг холбогдох байгууллагад шилжүүлж шуурхай шийдвэрлэх арга хэмжээ авч ажиллаж  байна. Хөвсгөлд зочлох жил зарласантай холбогдуулан жижиг дунд бизнес эрхлэгчдийн зүгээс ирүүлсэн өргөдлийг хүлээн авч дэмжиж ажиллаж чиглэл хүргүүлсэн. Энэ ажлын хүрээнд Мөрөн сумын Засаг даргын Тамгын газраас Брэнд бүтээгдэхүүн борлуулах нэгдсэн төвтэй болох ажлыг төлөвлөж байна.  Орчны бохирдол хог хаягдлын талаар өргөдөл гомдол аймгийн Хот тохижилт үйлчилгээний төв, аймгийн Засаг даргын Тамгын газар, Мөрөн сум болон төв зам дагуух бусад сумдад ирж байгаа бөгөөд аймгийн хэмжээнд нэгдсэн хог цэвэрлэгээг 5 сард зохион байгуулахаар төлөвлөгөө гаргаад байна.

        Цаашид өргөдөл гомдлын утга агуулга, шийдвэрлэлтийн байдалд дүн шинжилгээ хийж ажиллахад анхаарч байна.